‘അമ്മ’ സംഘടനാ തെരഞ്ഞെടുപ്പ്: മത്സരത്തില്‍ നിന്ന് പിന്മാറി ബാബുരാജ്
National Desk
Posted On July 31, 2025
A.M.M.A സംഘടനയുടെ തെരഞ്ഞെടുപ്പില്‍ നിന്ന് നടന്‍ ബാബുരാജ് പിന്മാറി. ജനറല്‍ സെക്രട്ടറി സ്ഥാനത്തേക്ക് നല്‍കിയ നാമ നിര്‍ദ്ദേശപത്രിക നടന്‍ പിന്‍വലിക്കും. തനിക്കെതിരെ വന്ന ആരോപണങ്ങള്‍ക്ക് പിന്നില്‍ ഗൂഢാലോചനയുണ്ടെന്നും സരിത എസ് നായരുടെ പരാതി ഇതിന്റെ ഭാഗമാണെന്നും ബാബുരാജ് പറഞ്ഞു.
ബാബുരാജിന്റെ വാക്കുകള്‍…. ‘തനിക്കെതിരെ വന്ന ആരോപണങ്ങള്‍ക്ക് പിന്നില്‍ ഗൂഢാലോചനയുണ്ട്. സരിത എസ് നായരുടെ പരാതി ഇതിന്റെ ഭാഗമാണ്. മോഹന്‍ലാലിന്റെ പേര് വലിച്ചിഴച്ചതില്‍ വേദനയുണ്ട്. നടന്‍ സുരേഷ് കൃഷ്ണയും മത്സരിക്കുന്നതില്‍ നിന്ന് പിന്‍മാറിയിട്ടുണ്ട്’.
ജനറൽ സെക്രട്ടറി സ്ഥാനത്തേക്ക് ബാബുരാജിന്റെ പേര് വന്നതിന് പിന്നാലെ നിരവധി വിമര്‍ശനങ്ങള്‍ ഉയര്‍ന്നിരുന്നു. ലൈംഗിക ആരോപണത്തിന് വിധേയനായ നടന്‍ ബാബുരാജ് മത്സരിക്കരുത് എന്ന പ്രതികരണവുമായി നടി മാല പാര്‍വതി ഉള്‍പ്പെടെയുള്ളവര്‍ രംഗത്തെത്തിയിരുന്നു. നടനും നിര്‍മാതാവുമായ വിജയ് ബാബുവും ബാബുരാജ് മത്സരിക്കുന്നതിനെ എതിര്‍ത്തിരുന്നു.
