ചരിത്രം കുറിക്കാൻ എത്തുന്നു, ഗ്രേറ്റസ്റ്റ് ഓഫ് ഓൾ ടൈം; വിജയ് ചിത്രത്തിന് തമിഴ്നാട്ടിലെ എല്ലാ തിയേറ്ററിലും റിലീസ്

തമിഴ് സിനിമാപ്രേമികള്‍ ഈ വര്‍ഷം ഏറെ പ്രതീക്ഷയോടെ കാത്തിരിക്കുന്ന സിനിമകളിലൊന്നാണ് ഗ്രേറ്റസ്റ്റ് ഓഫ് ഓള്‍ ടൈം അഥവാ ഗോട്ട് എന്ന വിജയ് ചിത്രം. തമിഴ് സിനിമാപേമികൾ മാത്രമല്ല കേരളത്തിലെ സിനിമ പ്രേമികളും കാത്തിരിക്കുന്ന സിനിമയാണ് ഗോട്ട്. തൻറെ രാഷ്ട്രീയ പ്രഖ്യാപനത്തിന് ശേഷം തിയേറ്ററുകളിലെത്തുന്ന ആദ്യ ചിത്രമെന്ന നിലയില്‍ വന്‍ പ്രതീക്ഷയാണ് വിജയ് ആരാധകര്‍ ഗോട്ടിൽ അർപ്പിച്ചിരിക്കുന്നത്. വെങ്കട് പ്രഭുവുമായി ആദ്യമായി വിജയ് ഒരുമിക്കുന്ന സിനിമയുടെ അനൗണ്‍സ്‌മെന്റ് തന്നെ സോഷ്യല്‍ മീഡിയയില്‍ വലിയ ചര്‍ച്ചയായിരുന്നു.

ബിഗിലിന് ശേഷം വിജയ് ഇരട്ടവേഷത്തിലെത്തുന്നുവെന്ന പ്രത്യേകതയും ഗോട്ടിനുണ്ട്. സയന്‍സ് ഫിക്ഷന്‍ രീതിയിലുള്ള സിനിമയാണെന്ന് ആദ്യത്തെ പോസ്റ്ററില്‍ തന്നെ വ്യക്തമാക്കിയിരുന്നു. അവഞ്ചേഴ്‌സ്, സ്റ്റാര്‍ വാര്‍സ് എന്നീ സിനിമകളുടെ വി.എഫ്.എക്‌സ് ചെയ്ത ലോല വി.എഫ്.എക്‌സാണ് ഗോട്ടിലെയും ഗ്രാഫിക്‌സിന് മേല്‍നോട്ടം വഹിക്കുന്നത്.

എന്നാൽ ഇപ്പോൾ പുറത്ത് വരുന്ന റിപ്പോർട്ടുകൾ പറയുന്നത് തമിഴ് സിനിമ ഇതുവരെ കണ്ടതില്‍ വെച്ച് ഏറ്റവും വലിയ റിലീസിനാണ് ഗോട്ട് തയാറെടുക്കുന്നത് എന്നാണ്. തമിഴ്‌നാട്ടിലെ എല്ലാ തിയേറ്ററുകളിലും ഈ വിജയ് ചിത്രം റിലീസ് ചെയ്യുമെന്നാണ് ഇപ്പോള്‍ വരുന്ന റിപ്പോര്‍ട്ടുകള്‍. 2022ല്‍ പുറത്തിറങ്ങിയ വിജയ് ചിത്രം ബീസ്റ്റിന്റെ ആദ്യദിന റെക്കോഡ് ഗോട്ട് തകര്‍ക്കുമെന്ന് ഏറെക്കുറെ ഉറപ്പായിക്കഴിഞ്ഞു. 37 കോടിയാണ് അന്ന് ബീസ്റ്റ് തമിഴ്‌നാട് ബോക്‌സ് ഓഫീസില്‍ നിന്ന് ആദ്യദിനം സ്വന്തമാക്കിയത്.

കേരളത്തില്‍ ഗോകുലം സിനിമാസാണ് ഗോട്ട് വിതരണം ചെയ്യുന്നത്. 600ലധികം തിയേറ്ററുകളില്‍ ചിത്രം റിലീസ് ചെയ്യും. വിജയ്‌യുടെ മുന്‍ ചിത്രം ലിയോയും കേരളത്തില്‍ റെക്കോഡ് ഓപ്പണിങ്ങാണ് ഇട്ടത്. 12 കോടിയാണ് ലിയോ ആദ്യത്തെ ദിവസം മാത്രം കേരളാ ബോക്‌സ് ഓഫീസില്‍ നിന്ന് സ്വന്തമാക്കിയത്. കേരളത്തിലെ മറ്റൊരു നടനും ആദ്യദിനം ഡബിള്‍ ഡിജിറ്റ് ക്രോര്‍ ഓപ്പണിങ് നേടാന്‍ സാധിക്കാത്തിടത്താണ് വിജയ് കേരളത്തിലെ തന്റെ ബോക്‌സ് ഓഫീസ് പവര്‍ കാണിച്ചത്. വമ്പൻ ഹൈപ്പിൽ എത്തിയ കെജിഫ് നേടിയത് ഏഴരക്കോടി രൂപയാണ്. കേരളത്തിൽ ഏറ്റവും കൂടുതൽ ഫാൻസുള്ള നടനും വിജയ് ആണെന്ൻ ആരാധകർ പറയുന്നത്. അതിനെ ശരി വെക്കുന്ന രീതിയിലാണ് വിജയ് ചിത്രങ്ങളുടെ കേരളത്തിലെ കളക്ഷനും.

250 കോടി ബജറ്റിലാണ് ഗ്രേറ്റസ്റ്റ് ഓഫ് ഓള്‍ ടൈം ഒരുങ്ങുന്നത്. യുവന്‍ ശങ്കര്‍ രാജ വിജയ്ക്ക് വേണ്ടി സംഗീതമൊരുക്കുന്ന സിനിമ കൂടിയാണ് ഗോട്ട്. വിജയ്ക്ക് പുറമെ പ്രശാന്ത്, പ്രഭുദേവ, ജയറാം, സ്‌നേഹ, മീനാക്ഷി ചൗധരി, അജ്മല്‍ അമീര്‍, എന്നിവരാണ് പ്രധന താരങ്ങൾ. അടുത്ത മാസം അഞ്ചിന് ഗോട്ട് തിയേറ്ററുകളിലെത്തും.