പൊന്നിയിൻ സെൽവൻ; ട്രെയ്‌ലർ പുറത്ത്

പ്രേക്ഷകർ ഏറെ കാത്തിരുന്ന മണിരത്‌നം ചിത്രം പൊന്നിയിൻ സെൽവന്റെ ട്രെയ്‌ലർ പുറത്ത്. ചെന്നൈ നെഹ്‌റു സ്റ്റേഡിയത്തിൽ ചൊവ്വാഴ്ച നടന്ന ചടങ്ങിൽ രജനികാന്തും കമൽ ഹാസനും ചേർന്നാണ് ട്രെയ്‌ലർ റിലീസ് ചെയ്തത്. മൂന്ന് ലക്ഷത്തോളം പേർ ട്രെയിലർ റിലീസ് ചെയ്ത് മിനിറ്റുകൾക്കകം കണ്ടു. തമിഴ്, മലയാളം, ഹിന്ദി, കന്നഡ, തെലുങ്ക് എന്നീ ഭാഷകളിലായി സെപ്തംബർ 30 ന് ചിത്രം ബിഗ് സ്‌ക്രീനുകളിൽ എത്തും.

കൽകി കൃഷ്ണമൂർത്തിയുടെ 1955 ൽ പുറത്തിറങ്ങിയ ‘പൊന്നിയൻ സെൽവൻ’ എന്ന നോവലിനെ ആസ്പദമാക്കി ചിത്രീകരിക്കുന്ന സിനിമ രണ്ട് ഭാഗമായാകും പുറത്തിറങ്ങുക. ആദ്യ ഭാഗം ഈ മാസവും രണ്ടാം ഭാഗം 2023 ലുമാകും റിലീസ് ചെയ്യുക. അഞ്ച് ഭാഷകളിലായി പുറത്തിറങ്ങിയ പൊന്നിയൻ സെൽവന്റെ ട്രെയിലർ തമിഴിൽ നടൻ കമൽഹാസൻ, മലയാളത്തിൽ പൃഥ്വിരാജ് സുകുമാരൻ, തെലുങ്കിൽ റാണ ദഗ്ഗുബതി, കന്നഡയ്ക്ക് ജയന്ത് കൈകിനി, ഹിന്ദിയിൽ അനിൽ കപൂർ എന്നിവരാണ് ശബ്ദം നൽകിയിരിക്കുന്നത്.

മൂന്ന് വർഷം നീണ്ടതായിരുന്നു പൊന്നിയൻ സെൽവന്റെ ചിത്രീകരണം. ഐശ്വര്യ റായ്, ചിയാൻ വിക്രം, ജയം രവി, കാർത്തി, ഐശ്വര്യ ലക്ഷ്മി, തൃഷ, ജയറാം എന്നിങ്ങനെ നിരവധി പേരാണ് ചിത്രത്തിലുള്ളത്.

content highlights – ponniyin selvan, trailer out