‘ഗോട്ടി’ല്‍ ഒരു സര്‍പ്രൈസ് വില്ലനുണ്ടെന്ന് വെങ്കട് പ്രഭു; മോഹന്‍ലാല്‍ ആണോയെന്ന് ആരാധകര്‍!

വിജയ് ചിത്രം GOAT സെപ്റ്റംബര്‍ അഞ്ചിനു തിയറ്ററുകളിലെത്തുകയാണ്. വെങ്കട് പ്രഭു സംവിധാനം ചെയ്യുന്ന ചിത്രം റിലീസിനു മണിക്കൂറുകള്‍ക്കു മുന്‍പ് തന്നെ പ്രീ സെയില്‍ റെക്കോര്‍ഡുകള്‍ ഭേദിച്ചു മുന്നേറുകയാണ്.

റിലീസിനു തൊട്ടുമുന്‍പ് സംവിധായകന്‍ വെങ്കട് പ്രഭു നടത്തിയ വെളിപ്പെടുത്തല്‍ സിനിമയുടെ ഹൈപ്പ് ഇരട്ടിയാക്കിയിരിക്കുകയാണ്. ഗോട്ടില്‍ ഇളയദളപതി വിജയ് അവതരിപ്പിക്കുന്ന നായക കഥാപാത്രത്തിന്റെ വില്ലനായി ഒരു സര്‍പ്രൈസ് എന്‍ട്രി ഉണ്ടാകുമെന്നാണ് വെങ്കട് പ്രഭു പറഞ്ഞത്.

സൂപ്പര്‍താരം മോഹന്‍ലാലും ഗോട്ടില്‍ ചെറിയൊരു വേഷം അവതരിപ്പിച്ചിട്ടുണ്ടെന്നാണ് നേരത്തെ പുറത്തുവന്ന റിപ്പോര്‍ട്ടുകള്‍. വെങ്കട് പ്രഭുവിനൊപ്പമുള്ള മോഹന്‍ലാലിന്റെ ചിത്രങ്ങളും സോഷ്യല്‍ മീഡിയയില്‍ വൈറലായിരുന്നു. മോഹന്‍ലാല്‍ ആണോ വെങ്കട് പ്രഭു ഉദ്ദേശിച്ച സര്‍പ്രൈസ് വില്ലന്‍ എന്നാണ് ആരാധകര്‍ ചോദിക്കുന്നത്. എന്നാല്‍ മോഹന്‍ലാല്‍ അല്ല പ്രധാന വില്ലനെന്നും മറ്റൊരു പ്രമുഖ താരം വില്ലന്‍ വേഷത്തിലെത്തുമെന്നും അതാണ് ഈ സിനിമയിലെ വലിയ സര്‍പ്രൈസ് എന്നും വെങ്കട് പ്രഭു ഒരു തമിഴ് മാധ്യമത്തിനു നല്‍കിയ അഭിമുഖത്തില്‍ പറഞ്ഞു.