ഇന്ത്യയിലേക്ക് വന്ന എണ്ണ ടാങ്കര്‍ ആക്രമിച്ച്‌ ഹൂതികള്‍

ഇന്ത്യയിലേക്ക് വന്ന എണ്ണ ടാങ്കറിന് നേരെ ഹൂതി മിസൈലാക്രമണം. പനാമയില്‍ രജിസ്റ്റർ ചെയ്യപ്പെട്ട ബ്രിട്ടീഷ് ഉടമസ്ഥതയിലുള്ള എം.വി ആൻഡ്രോമെഡ സ്റ്റാർ എന്ന കപ്പലാണ് ഇന്നലെ പുലർച്ചെ ചെങ്കടലില്‍ യെമൻ തീരത്തിന് സമീപം ആക്രമിക്കപ്പെട്ടത്.

കപ്പലിന് നേരെ മൂന്ന് ബാലിസ്റ്റിക് മിസൈലുകള്‍ ഹൂതികള്‍ വിക്ഷേപിച്ചു. കപ്പലിലെ കേടുപാടുകള്‍ ഗുരുതരമല്ലെന്നും ജീവനക്കാർ സുരക്ഷിതരാണെന്നും അധികൃതർ അറിയിച്ചു. മിസൈലുകളിലൊന്ന് മേഖലയിലുണ്ടായിരുന്ന എം.വി. മൈഷ എന്ന ലൈബീരിയൻ കപ്പലിന് സമീപം പതിച്ചെങ്കിലും നാശനഷ്ടമില്ല. റഷ്യയിലെ പ്രിമോർസ്കില്‍ നിന്ന് ക്രൂഡ് ഓയിലുമായി പുറപ്പെട്ട കപ്പല്‍ ഗുജറാത്തിലെ വാഡിനാർ തുറമുഖത്ത് എത്തേണ്ടതായിരുന്നു. അറ്റക്കുറ്റപ്പണികള്‍ നടത്തി കപ്പല്‍ യാത്ര പുനരാരംഭിച്ചെന്നാണ് വിവരം.