ഇടുക്കി ശാന്തൻപാറയില്‍ വീണ്ടും ചക്കകൊമ്ബന്റെ ആക്രമണം; ആന റേഷൻ കട തകര്‍ത്തു

ശാന്തൻപാറയില്‍ വീണ്ടും ചക്കകൊമ്ബന്റെ ആക്രമണം. ശാന്തൻപാറ ആനയിറങ്കലില്‍ ആന റേഷൻ കട തകർത്തു. മുമ്ബ് അരികൊമ്ബനടക്കം തകർത്ത റേഷൻ കടയാണ് വീണ്ടും കാട്ടാന തകർത്തത്.

പുലർച്ചെ നാലുമണിയോടുകൂടിയാണ് സംഭവം. കുമളി – മൂന്നാർ സംസ്ഥാനപാതയില്‍ ആനയിറങ്കലില്‍ പ്രവർത്തിക്കുന്ന റേഷൻ കടയ്ക്ക് നേരെ ചക്കകൊമ്ബൻ ആക്രമണം അഴിച്ചുവിടുകയായിരുന്നു.

എംഎം രവീന്ദ്രന്റെ ലൈസൻസിയിലുള്ള ഉടുമ്ബൻചോല എആർഡി 26 നമ്ബർ കടയാണ് തകർത്തത്. കെട്ടിടത്തിന്റെ ഒരു ഭാഗം തകർത്ത ആന അരി ചാക്കുകള്‍ വലിച്ച്‌ പുറത്തേക്കിട്ട് അരി ഭക്ഷിച്ചു. നാട്ടുകാർ ബഹളം വെച്ചതിന് തുടർന്ന് ഏറെ നേരത്തിനു ശേഷമാണ് ആന മേഖലയില്‍ നിന്നും മടങ്ങിയത്. തുടർന്ന് ആർആർടി സംഘവും സ്ഥലത്തെത്തി. മുമ്ബ് നിരവധിതവണ ഇതേ റേഷൻ കട അരികൊമ്ബൻ ഉള്‍പ്പെടെയുള്ള കാട്ടാനകള്‍ തകർത്തിരുന്നു.