തേക്കടിയില്‍ കാട്ടാന ആക്രമണം; വനംവകുപ്പ് ജീവനക്കാരന് ഗുരുതര പരുക്ക്

തേക്കടിയില്‍ കാട്ടാനയുടെ ആക്രമണത്തില്‍ വനംവകുപ്പ് ജീവനക്കാരന് പരുക്കേറ്റു. തേക്കടി ഡിവിഷന്‍ ഓഫിസിലെ സീനിയര്‍ ക്ലര്‍ക്കായ കട്ടപ്പന നരിയംപാറ സ്വദേശി റോബി വര്‍ഗീസിനാണ് പരുക്കേറ്റത്. ആനയുടെ ചവിട്ടേറ്റ റോബിയുടെ പരിക്ക് ഗുരുതരമാണ്.

തേക്കടി ബോട്ട് ലാന്‍ഡിംഗില്‍ വെച്ചായിരുന്നു സംഭവം. രാവിലെ നടക്കാനിറങ്ങിയ റോബി ആനയുടെ മുന്നില്‍ പെടുകയായിരുന്നു. ആനയെ കണ്ട ഓടിയ റോബി തൊട്ടടുത്തുള്ള ട്രഞ്ചില്‍ വീണു. ട്രഞ്ചിനുള്ളിലൂടെ നടന്നു വന്ന ആന റോബിയെ ചവിട്ടുകയായിരുന്നു.

ഗുരുതരമായി പരിക്കേറ്റ റോബിയെ കട്ടപ്പനയിലെ സ്വകാര്യ ആശുപത്രിയില്‍ പ്രവേശിപ്പിച്ചു. തുടര്‍ന്ന് കോട്ടയച്ചെ ആശുപത്രിയിലേക്ക് കൊണ്ടുപോയി. സംഭവത്തെ തുടര്‍ന്ന് തേക്കടിയില്‍ പ്രഭാതസവാരിയും സൈക്കിള്‍ സവാരിയും നിരോധിച്ചു.