കൊച്ചി നഗരത്തിലെ കൊലപാതകം; മൂന്നു പ്രതികള്‍ പിടിയില്‍

കൊച്ചി നഗരത്തില്‍ പുലര്‍ച്ചെ നടന്ന കൊലപാതകത്തില്‍ മൂന്നു പേര്‍ പിടിയില്‍. നെട്ടൂര്‍ സ്വദേശികളായ തോമസ്, ഹര്‍ഷാദ്, സുധീര്‍ എന്നിവരാണ് പിടിയിലായത്. സിസിടിവി ദൃശ്യങ്ങളില്‍ നിന്ന് ലഭിച്ച തെളിവുകളുടെ അടിസ്ഥാനത്തില്‍ കൊച്ചി സെന്‍ട്രല്‍ പോലീസാണ് ഇവരെ കസ്റ്റഡിയില്‍ എടുത്തത്. പ്രതികളുടെ അറസ്റ്റ് ഉടന്‍ രേഖപ്പെടുത്തും. വരാപ്പുഴ സ്വദേശി ശ്യാമാണ് കൊല്ലപ്പെട്ടത്. പ്രതികള്‍ എത്തിയ വാഗണ്‍ ആര്‍ കാറിന്റെ നമ്പര്‍ സിസിടിവി ദൃശ്യങ്ങളില്‍ നിന്ന് ലഭിച്ചിരുന്നു.

സ്ഥലത്തുണ്ടായിരുന്ന ഒരു ട്രാന്‍സ്‌ജെന്‍ഡറിന് അടുത്തേക്ക് മൂന്നു സംഘങ്ങള്‍ എത്തിയെന്നും കാറിലെത്തിയ മൂന്നാമത്തെ സംഘത്തെ കളിയാക്കി ശ്യാം പാട്ടു പാടിയത് സംഘര്‍ഷത്തിലേക്ക് നയിക്കുകയുമായിരുന്നെന്ന് പോലീസ് പറയുന്നു. തര്‍ക്കത്തിനിടെ കാറിലെത്തിയ സംഘത്തിലെ ഒരാള്‍ കത്തിയെടുത്ത് ശ്യാമിനെയും അരുണിനേയും കുത്തുകയായിരുന്നു.

പരിക്കേറ്റ ശ്യാം ഓടി രക്ഷപ്പെടാനുള്ള ശ്രമത്തിനിടെ കുഴഞ്ഞ് വീഴുകയും ആശുപത്രിയില്‍ എത്തിക്കുമ്പോള്‍ മരിക്കുകയുമായിരുന്നു. സംഭസ്ഥലത്ത് നിന്ന് രക്ഷപ്പെടാനുള്ള ശ്രമത്തിനിടെ ഒരു പ്രതിക്ക് പരിക്കേറ്റതായും വിവരമുണ്ട്. സൗത്ത് പാലത്തിന് സമീപം കളത്തിപ്പറമ്പ് റോഡില്‍ ഷോപ്പിങ് കോംപ്ലക്‌സിന് മുന്നില്‍ പുലര്‍ച്ചെ രണ്ടുമണിയോടെയാണ് സംഭവം.