പൂച്ചകടിയേറ്റ് വാക്‌സിനെടുക്കാനെത്തിയ യുവതിയെ ആശുപത്രിക്കു മുന്നില്‍ വെച്ച് പട്ടി കടിച്ചു

പൂച്ചയുടെ കടിയേറ്റ് വാക്‌സിനെടുക്കാനെത്തിയ യുവതിയെ ആശുപത്രിക്കു മുന്നില്‍ വെച്ച് പട്ടി കടിച്ചു. തിരുവനന്തപുരം, വിഴിഞ്ഞം കൊട്ടുകാല്‍ സ്വദേശിനി അപര്‍ണ (31)നാണ് കടിയേറ്റത്. കുത്തിവെപ്പെടുക്കാന്‍ സാമൂഹികാരോഗ്യ കേന്ദ്രത്തിലെത്തിയപ്പോളാണ് അപര്‍ണയെ തെരുവുനായ ആക്രമിച്ചത്.

വീട്ടില്‍ വളര്‍ത്തുന്ന പൂച്ചയുടെ കടിയേറ്റതിനെത്തുടര്‍ന്നാണ് ഇന്ന് രാവിലെ ഏഴരയോടെ അപര്‍ണ സാമൂഹികാരോഗ്യ കേന്ദ്രത്തില്‍ എത്തിയത്. ആശുപത്രി ഗ്രില്ലിനുള്ളില്‍ കിടന്നിരുന്ന നായയാണ് ആക്രമിച്ചത്. കാലില്‍ ആഴത്തില്‍ മുറിവേറ്റ അപര്‍ണയെ പ്രാഥമിക ശുശ്രൂഷയ്ക്ക് ശേഷം ജനറല്‍ ആശുപത്രിയിലേക്ക് അയച്ചു.