പ്രൊഫ. ജെ. റോസ്ചന്ദ്രന്‍ പുരസ്‌കാരം ഗോപിനാഥ് മുതുകാടിന്
News Desk
Posted On May 22, 2023
കാട്ടാക്കട ക്രിസ്ത്യന്‍ കോളേജ് പ്രിന്‍സിപ്പലും പ്രഗല്‍ഭ അധ്യാപകനുമായിരുന്ന പ്രൊഫ. ജെ. റോസ്ചന്ദ്രന്റെ പേരില്‍ കാട്ടാക്കട ക്രിസ്ത്യന്‍ കോളേജ് അലുമ്നി അസോസിയേഷന്‍ ഏര്‍പ്പെടുത്തിയ പുരസ്‌കാരം ഗോപിനാഥ് മുതുകാടിന്. 50000 രൂപയും കാരയ്ക്കാമണ്ഡപം വിജയകുമാര്‍ രൂപകല്‍പ്പന ചെയ്ത ശില്പവും പ്രശസ്തിപത്രവുമാണ് പുരസ്‌കാരം. പ്രൊഫ. ജെ. റോസ്ചന്ദ്രന്റെ ജന്മദിനമായ ജൂണ്‍ 19 ന് പുരസ്‌കാരം സമ്മാനിക്കും.
നിയമസഭാ മുന്‍ സെക്രട്ടറിയും മുന്‍ ജില്ലാ ജഡ്ജിയും ആയ എസ്.വി. ഉണ്ണികൃഷ്ണന്‍ നായര്‍ ചെയര്‍മാനും പത്രപ്രവര്‍ത്തകനും എഴുത്തുകാരനുമായ കെ. ആര്‍. അജയന്‍ സെക്രട്ടറിയും, കാട്ടാക്കട ക്രിസ്ത്യന്‍ കോളേജിലെ പൂര്‍വ്വ വിദ്യാര്‍ഥികളായ മുന്‍ ജില്ലാ ജഡ്ജി എ കെ ഗോപകുമാര്‍, മുന്‍ പി എസ് സി അംഗം ഡോ: ഡി.രാജന്‍ എഴുത്തുകാരി ഡോ.ബി. സരോജം, സീമാറ്റ് മുന്‍ ഡയറക്ടര്‍ പ്രൊഫ: സുലൈഖ റഷീദ്, ചലച്ചിത്ര സംവിധായകന്‍ സജിന്‍ ലാല്‍ എന്നിവര്‍ ഉള്‍പ്പെട്ട ജൂറിയാണ് പുരസ്‌കാരം നിര്‍ണയിച്ചത്.
സാമൂഹ്യ, സാംസ്‌കാരിക, സന്നദ്ധ, അക്കാദമിക് രംഗത്തെ പ്രവര്‍ത്തനങ്ങള്‍ വിലയിരുത്തിയാണ് ഗോപിനാഥ് മുതുകാടിനെ പുരസ്‌കാരത്തിന് തെരഞ്ഞെടുത്തത്.
Trending Now
