കെഎസ്ആര്‍ടിസി ബസിന്റെ മുന്നിലേക്ക് കാട്ടാന തേക്ക് മറിച്ചിട്ടു; കല്ലു കൊണ്ട് മരം മുറിച്ചു മാറ്റി കണ്ടക്ടര്‍

കെഎസ്ആര്‍ടിസി ബസിന്റെ മുന്നിലേക്ക് കാട്ടാന മറിച്ചിട്ട തേക്കുമരം കല്ലു കൊണ്ട് മുറിച്ചു മാറ്റി കണ്ടക്ടര്‍. അച്ചന്‍കോവിലില്‍ നിന്ന് ചൊവ്വാഴ്ച രാവിലെ ചെങ്കോട്ട വഴി പുനലൂരിലേക്ക് പോയ ബസിനു മുന്നിലേക്കാണ് ആന തേക്കുമരം മറിച്ചിട്ടത്. കുംഭാവുരുട്ടിക്കും മണലാറിനും ഇടയക്കുള്ള ഈ പ്രദേശത്ത് മൊബൈല്‍ കവറേജ് ഇല്ല.

ഇതു മൂലം മരം വീണ വിവരം പുറത്തറിയിക്കാന്‍ കഴിയാത്ത സാഹചര്യത്തില്‍ കണ്ടക്ടര്‍ എം പി വിഭുവ് രംഗത്തിറങ്ങുകയാരുന്നു. ബസില്‍ ആയുധങ്ങളൊന്നും ഉണ്ടായിരുന്നില്ല. തുടര്‍ന്ന് കരിങ്കല്ല് പ്രയോഗിക്കാന്‍ തീരുമാനിച്ചു. ഡ്രൈവര്‍ എ.ഷാനവാസിന്റെ സഹായത്തോടെ ഏകദേശം അര മണിക്കൂറുകൊണ്ടു തേക്ക് മുറിച്ചുമാറ്റി ഗതാഗതം പുനഃസ്ഥാപിച്ചു.