കോഴിക്കോട് ഖാസി പീഡിപ്പിച്ചെന്ന് പരാതി നല്‍കി യുവതി; പോലീസ് കേസെടുത്തു

കോഴിക്കോട് ഖാസി സയ്യിദ് മുഹമ്മദ് കോയ ജമലുല്ലൈലി തങ്ങള്‍ പീഡിപ്പിച്ചെന്ന പരാതിയുമായി യുവതി. കണ്ണൂര്‍ സ്വദേശിനിയായ യുവതിയാണ് കോഴിക്കോട് വനിതാ പോലീസ് സ്‌റ്റേഷനില്‍ പരാതി നല്‍കിയത്. പരാതിയില്‍ വെള്ളിയാഴ്ച രാത്രി കേസെടുത്തു. രണ്ടാംഭര്‍ത്താവുമായുള്ള കുടുംബപ്രശ്നം പരിഹരിക്കാമെന്ന് വാഗ്ദാനം നല്‍കി രണ്ടുവര്‍ഷത്തിനിടയില്‍ പലതവണയായി പീഡിപ്പിച്ചതായാണ് യുവതിയുടെ പരാതി.

പരപ്പനങ്ങാടി ആനങ്ങാടിയിലെ ഖാസിയുടെ വീടിനുമുന്നിലെ സന്ദര്‍ശകര്‍ക്കുള്ള ഷെഡില്‍വെച്ചാണ് പീഡിപ്പിച്ചതെന്നാണ് യുവതി പോലീസില്‍ മൊഴിനല്‍കിയത്. ഖാസിയുടെ ഡ്രൈവര്‍ പ്രേരിപ്പിച്ചെന്ന യുവതിയുടെ പരാതിയില്‍ ഇയാള്‍ക്കെതിരേയും കേസെടുത്തിട്ടുണ്ട്.

അതേസമയം ആരോപണത്തിനെതിരെ കോഴിക്കോട് ഖാസി ഓഫീസ് രംഗത്തെത്തിയിട്ടുണ്ട്. കുടുംബ പ്രശ്നം പരിഹരിക്കാന്‍ ശ്രമം നടക്കുന്നതിനിടെയാണ് വ്യാജ പരാതിയുമായി യുവതി രംഗത്തെത്തിയതെന്നും ഇത് സമ്മര്‍ദ തന്ത്രത്തിന്റെ ഭാഗം മാത്രാണെന്നും ഖാസി ഓഫീസ് പ്രസ്താവനയില്‍ അറിയിച്ചു.