മിമിക്രി-സിനിമാ താരവും ടെലിവിഷന്‍ അവതാരകയുമായിരുന്ന സുബി സുരേഷ് അന്തരിച്ചു. 42 വയസായിരുന്നു. കരള്‍ രോഗത്തെത്തുടര്‍ന്ന് ആലുവ രാജഗിരി ആശുപത്രിയില്‍ ചികിത്സയിലായിരുന്നു. ഇതിനിടെ ന്യുമോണിയ ബാധിച്ചതിനെത്തുടര്‍ന്ന് നാലു ദിവസമായി അത്യാസന്ന നിലയിലായിരുന്നു. ബുധനാഴ്ച രാവിലെ 10 മണിയോടെയാണ് അന്ത്യം സംഭവിച്ചത്. കുറച്ചു കാലമായി സുബിയെ ആരോഗ്യ പ്രശ്‌നങ്ങള്‍ വേട്ടയാടിയിരുന്നു.
വര്‍ഷങ്ങളോളം കലാഭവനില്‍ പ്രവര്‍ത്തിച്ച സുബി മിമിക്രി രംഗത്ത് എത്തിയ സ്ത്രീയെന്ന നിലയിലാണ് ശ്രദ്ധേയയായത്. ഏഷ്യാനെറ്റ് ചാനലിലെ സിനിമാല എന്ന പരിപാടിയിലൂടെ ജനപ്രിയയായി. തൃപ്പൂണിത്തുറയിലായിരുന്നു ജനനം. തൃപ്പൂണിത്തുറ സര്‍ക്കാര്‍ സ്‌കൂളിലും എറണാകുളം സെന്റ് തെരേസാസ് കോളജിലുമാണ് വിദ്യാഭ്യാസം പൂര്‍ത്തിയാക്കി.
രാജസേനന്‍ സംവിധാനം ചെയ്ത കനക സിംഹാസനം എന്ന ചിത്രത്തിലൂടെയായിരുന്നു സിനിമയിലെ അരങ്ങേറ്റം. അതിനു മുന്‍പായി നിരവധി ടെലിവിഷന്‍ പരിപാടികളിലും സീരിയലുകളിലും സ്റ്റേജ് ഷോകളിലും പങ്കെടുത്തിട്ടുണ്ട്. സൂര്യ ടിവി സംപ്രേഷണം ചെയ്ത കുട്ടിപ്പട്ടാളം എന്ന കുട്ടികളുടെ പരിപാടി ഏറെ ശ്രദ്ധ നേടിയിരുന്നു.
Trending Now
