പിതാവിനെ മര്‍ദ്ദിച്ചത് ചോദ്യം ചെയ്ത യുവാവിനെയും സുഹൃത്തിനെയും വധിക്കാന്‍ ശ്രമം; രണ്ടു പേര്‍ പിടിയില്‍
News Desk
Posted On February 6, 2023
മുനമ്പത്ത് പിതാവിനെ മര്‍ദ്ദിച്ചത് ചോദ്യം ചെയ്ത യുവാവിനെയും തടയാന്‍ ശ്രമിച്ച സുഹൃത്തിനെയും വധിക്കാന്‍ ശ്രമിച്ച കേസില്‍ രണ്ടുപേര്‍ അറസ്റ്റില്‍. പള്ളിപ്പുറം കോണ്‍വെന്റിന് പടിഞ്ഞാറ് വടശ്ശേരി വീട്ടില്‍ അനു ആന്റണി (മെബിന്‍ 39) തേവാലില്‍ സജീഷ് (കുമ്പിടി 38 ) എന്നിവരാണ് മുനമ്പം പോലീസിന്റെ പിടിയിലായത്.
പള്ളിപ്പുറം കോണ്‍വെന്റിന് പടിഞ്ഞാറ് വച്ച് വാക്കുതര്‍ക്കത്തെ തുടര്‍ന്ന് വീരപ്പന്‍ചിറ വീട്ടില്‍ പ്രദീപിന് മര്‍ദ്ദനമേറ്റിരുന്നു. ഇതു ചോദ്യം ചെയ്ത മകന്‍ പ്രജിത്തിനേയും, തടയാന്‍ ശ്രമിച്ച സുഹൃത്ത് മഹേഷിനേയും ആക്രമിക്കുകയായിരുന്നു. മഹേഷിനെ വയറ്റില്‍ കത്തികൊണ്ട് കുത്തിപ്പരിക്കേല്‍പ്പിച്ചു. അനു ആന്റണിയും, സജീഷും മുനമ്പം, വടക്കേക്കര സ്റ്റേഷനുകളില്‍ നിരവധി കേസുകളിലെ പ്രതിയും, റൗഡി ലിസ്റ്റില്‍ ഉളളവരുമാണ്.
സംഭവത്തിനു ശേഷം തിരിച്ചറിയാനാവാത്ത വിധത്തില്‍ രൂപമാറ്റം വരുത്തി തമിഴ്‌നാട്ടില്‍ ഒളിവില്‍ കഴിയുകയായിരുന്നു. ഇന്‍സ്‌പെക്ടര്‍ എ.എല്‍.യേശുദാസ്, സബ് ഇന്‍സ്‌പെക്ടര്‍ ടി.കെ.രാജീവ്, എ.എസ്.ഐ എം.വി.രശ്മി എസ്.സി.പി.ഒ പി.എ.ജയദേവന്‍ സി.പി. ഒ മാരായ കെ.എ.ബെന്‍സി, കെ.പി.അഭിലാഷ് തുടങ്ങിയവരുള്‍പ്പെട്ട അന്വേഷണ സംഘമാണ് പ്രതികളെ അറസ്റ്റ് ചെയ്തത്. കോടതിയില്‍ ഹാജരാക്കി റിമാന്‍ഡ് ചെയ്തു.
Trending Now
