സ്‌റ്റോപ്പില്ലാത്ത ട്രെയിനില്‍ നിന്ന് ചാടിയിറങ്ങാന്‍ ശ്രമം; കൊരട്ടിയില്‍ രണ്ടു പേര്‍ വീണു മരിച്ചു

സ്‌റ്റോപ്പില്ലാത്ത ട്രെയിനില്‍ നിന്ന് ചാടിയിറങ്ങാന്‍ ശ്രമിച്ച രണ്ടു പേര്‍ മരിച്ചു. കൊരട്ടി സ്വദേശികളായ കൃഷ്ണ കുമാര്‍ (16), സഞ്ജയ് (17) എന്നിവരാണ് മരിച്ചത്. കൊരട്ടി റെയില്‍വേ സ്റ്റേഷനിലാണ് സംഭവം. എറണാകുളത്തു നിന്ന് കൊരട്ടിയിലേക്ക് വരുമ്പോള്‍ പുലര്‍ച്ചെ മൂന്നു മണിയോടെയാണ് സംഭവമുണ്ടായതെന്ന് കരുതുന്നു.

രാവിലെ അഞ്ചു മണിയോടെയാണ് ഇരുവരുടേയും മൃതദേഹം കണ്ടെത്തിയത്. മംഗളൂരു എക്സ്പ്രസും അമൃത എക്സ്പ്രസുമാണ് ഈ സമത്ത് കൊരട്ടിവഴി തൃശൂര്‍ ഭാഗത്തേക്ക് പോയിരുന്നത്. ഇതില്‍ ഏത് ട്രെയിനിലാണ് ഇവര്‍ സഞ്ചരിച്ചിരുന്നതെന്ന് വ്യക്തമല്ല.

അതിവേഗത്തില്‍ വന്ന ട്രെയിനില്‍ നിന്ന് ചാടിയിറങ്ങിയപ്പോള്‍ തലയിടിച്ച് വീണതായിരിക്കാം മരണകാരണമെന്ന് കരുതുന്നു. മൃതദേഹങ്ങള്‍ ആശുപത്രിയിലേക്ക് മാറ്റി. സംഭവത്തില്‍ പോലീസ് അന്വേഷണം പുരോഗമിക്കുന്നു.