ജോക്കറിന്റെ ‘ഹാർലി ക്വിൻ’; ലേഡി ഗാഗ വാങ്ങിയ പ്രതിഫലം 100 കോടി

ജോക്കർ 2 സിനിമയിലെ ഹാർലി ക്വിനായി എത്തുന്ന ലേഡി ഗാഗ വാങ്ങിയ പ്രതിഫലം ഏവരെയും ഞെട്ടിക്കുകയാണ്. വെറൈറ്റി മാഗസിൻ റിപ്പോർട്ട് ചെയ്യുന്നത് 10 ദശലക്ഷം ഡോളർ ആണ്. നായകൻ ജോക്വിൻ ഫീനിക്സ് 20 ദശലക്ഷം ഡോളർ വാങ്ങുന്നതായും റിപ്പോർട്ടുണ്ട്. സിനിമ ഡിസി കോമിക്ക്‌സിലെ ജോക്കറിനെ ആസ്പദമാക്കിയാണ്. ഹാർലി ക്വിൻ കോമിക്ക്സ് പ്രകാരം ജോക്കറുമായി പ്രണയത്തിലാകുന്ന കഥാപാത്രമാണ്. ജോക്കറിന്റെ സൈക്കാർട്ടിസ്റ്റായ ക്വിൻ അയാളുമായി പ്രണയത്തിലാവുകയും കുറ്റകൃത്യങ്ങളിൽ പങ്കാളിയാകുകയും ചെയ്യുന്നു.

മാർഗോട്ട് റോബിയാണ് ഡിസിഇയു സിനിമകളിൽ ഹാർലി ക്വിനിനെ അവതരിപ്പിക്കുന്നത്. തന്റെ കഥാപാത്രമായ റോബിയുടെ പ്രകടനത്തിന് ഏറെ പ്രശംസയും ലഭിക്കുന്നുണ്ട്. 2021-ൽ പുറത്തിറങ്ങിയ ‘ദി സൂയിസൈഡ് സ്ക്വാഡ്’ എന്ന ചിത്രത്തിലാണ് നടി അവസാനമായി ക്വിനിനെ അവതരിപ്പിച്ചത്.

2024 ഒക്ടോബർ നാലാം തീയതിയാണ് ‘ജോക്കർ: ഫോളി എ ഡ്യൂക്സ്’ എന്ന് പേരിട്ടിരിക്കുന്ന പുതിയ സിനിമ റിലീസ് ചെയ്യുന്നത്. ആദ്യ ഭാഗം റിലീസ് ചെയ്തതിന് കൃത്യം അഞ്ച് വർഷത്തിന് ശേഷമാണ് രണ്ടാം ഭാഗം എത്തുന്നത്. ചിത്രം സംവിധാനം ചെയ്യുന്നത് ടോഡ് ഫിലിപ്സ് ആണ്. 2019ൽ പുറത്തിറങ്ങിയ ജോക്കറിന്റെ ആദ്യ ഭാഗം മികച്ച വിജയം കൈവരിച്ചിരുന്നു. ആർതർ ഫ്ലെക്ക് എന്ന സ്റ്റാൻഡ് അപ്പ് ഹാസ്യനടൻ എങ്ങനെ ജോക്കർ എന്ന സൂപ്പർവില്ലനായി മാറുന്നു എന്നാണ് സിനിമ പറയുന്നത്.

Content Highlights – Joker 2, harley quinn, lady gaga