ശ്രീലങ്ക പ്രക്ഷുബ്ധം; പ്രക്ഷോഭങ്ങള്‍ക്ക് പിന്തുണയറിയിച്ച് ശ്രീലങ്കന്‍ മുന്‍ ക്രിക്കറ്റ് താരം സനത് ജയസൂര്യ

ശ്രീലങ്കയില്‍ നടക്കുന്ന സര്‍ക്കാര്‍ വിരുദ്ധ പ്രക്ഷോഭങ്ങള്‍ക്ക് പിന്തുണയറിയിച്ച് ശ്രീലങ്കന്‍ മുന്‍ ക്രിക്കറ്റ് താരം സനത് ജയസൂര്യ. ശ്രീലങ്കയില്‍ കടുത്ത സാമ്പത്തിക പ്രതിസന്ധിയെ തുടര്‍ന്നാണ് പ്രക്ഷോഭ പരിപാടിയുമായി ജനങ്ങള്‍ തെരുവിലിറങ്ങിയത്.

താന്‍ എന്നും ജനങ്ങള്‍ക്കൊപ്പമാണ്. പരാജയപ്പെട്ട ഒരു നേതാവിനെ പുറത്താക്കുക എന്ന ഒറ്റ ലക്ഷ്യത്തോടെ രാജ്യം ഒന്നിക്കുന്ന ഒരു കാഴ്ച്ച ജീവിതത്തിലുടെ നീളെ കണ്ടിട്ടില്ല. ഞാന്‍ എപ്പോഴും ജനങ്ങള്‍ക്കൊപ്പം നില്‍ക്കും. ഉടന്‍ വിജയം ആഘോഷിക്കുമെന്നും സനത് ജയസൂര്യ ട്വീറ്റില്‍ കുറിച്ചു.

സനത് ജയസൂര്യയെ കൂടാതെ ശ്രീലങ്കന്‍ മുന്‍ ക്രിക്കറ്റ് താരങ്ങളായ കുമാര്‍ സംഗക്കാര, മഹേള ജയവര്‍ധനെ എന്നിവരും പ്രതിഷേധക്കാര്‍ക്ക് പിന്തുണ അറിയിച്ചിട്ടുണ്ട്. ശ്രീലങ്കയില്‍ കര്‍ഫ്യൂ പ്രഖ്യാപിച്ചതിന് പിന്നാലെയാണ് ജനങ്ങള്‍ പ്രതിഷേധവുമായി രംഗത്തെത്തിയത്. പ്രക്ഷോഭം മുന്നില്‍ക്കണ്ട് നേരത്തേതന്നെ പ്രസിഡന്റ് ഗോട്ടബയ രാജപക്സെയെ സുരക്ഷിത സ്ഥാനത്തേക്ക് മാറി എന്നാണ് റിപ്പോര്‍ട്ട്.

Content Highlights – Sanath Jayasuriya, Expressed his support for the anti-government protests in Sri Lanka