വെര്‍ച്വല്‍ ഭാര്യയുമായി ആറാം വിവാഹ വാര്‍ഷികം ആഘോഷമാക്കി ജപ്പാൻകാരൻ

ഒരു വിവാഹ വാർഷികാഘോഷത്തിന്‍റെ വാർത്ത ട്രെൻഡിങ്ങാകുകയാണ് സാമൂഹ്യമാധ്യമങ്ങളില്‍.
വെർച്വല്‍ ഭാര്യയുമായി ആറാം വിവാഹ വാർഷികം ആഘോഷിക്കുകയാണ് ഒരു ജപ്പാൻകാരൻ.

സാങ്കല്‍പ്പിക വെർച്വല്‍ പോപ്പ് താരവും വോക്കലോയിഡ് കഥാപാത്രവുമായ ഹാറ്റ്‌സുൻ മിക്കു, തന്‍റെ ഭാര്യയാണെന്നാണ് 41-കാരനായ അകിഹിക്കോ അവകാശപ്പെടുന്നത്. നവംബർ 4 ന് വിവാഹ വാർഷികത്തില്‍ മുറിച്ച കേക്കിന്‍റെ രസീത് സാമൂഹ്യമാധ്യമങ്ങളില്‍ പങ്കുവച്ചുകൊണ്ടാണ് അകിഹിക്കോ തന്‍റെ ജീവിത പങ്കാളിക്ക് ആശംസകള്‍ നേർന്നത്.

സാങ്കല്‍പ്പിക കഥാപാത്രങ്ങളോട് ലൈംഗികമായി ആകർഷിക്കപ്പെടുന്ന ആളുകളെ വിവരിക്കുന്ന ‘ഫിക്ടോസെക്ഷ്വല്‍’ എന്ന വിഭാഗത്തില്‍ പെടുന്ന വ്യക്തിയാണ് താനെന്നാണ് അകിഹിക്കോ അവകാശപ്പെടുന്നത്. 2007 -ല്‍ ക്രിപ്‌റ്റണ്‍ ഫ്യൂച്ചർ മീഡിയ പുറത്തിറക്കിയ വോക്കലോയിഡ് സോഫ്‌റ്റ്‌വെയർ വോയ്‌സ്‌ ബാങ്കാണ് ഹാറ്റ്‌സ്യൂണ്‍ മിക്കു. ഹാറ്റ്‌സ്യൂണ്‍ മിക്കുവുമായി പ്രണയത്തിലായി, പിന്നീട് 2018 -ല്‍ ടോക്കിയോ ചാപ്പലില്‍ ഏകദേശം 2 ദശലക്ഷം യെൻ ചെലവാക്കിയാണ് അകിഹിക്കോ മികുവുമായുള്ള വിവാഹം നടത്തിയത്.