പട്രോളിങ്ങിനിടെ എസ് ഐയെ വടിവാളുകൊണ്ട് വെട്ടിപ്പരിക്കേൽപ്പിച്ചു; പ്രതി അറസ്റ്റിൽ

ആലപ്പുഴ നൂറനാട് സ്റ്റേഷനിലെ എസ് ഐ ക്ക് വെട്ടേറ്റു. വി ആർ അരുൺ കുമാറിനാണ് വെട്ടേറ്റത്. സമീപവാസിയായ സുഗതൻ എന്നയാളാണ് എസ് ഐ യെ വടിവാളുകൊണ്ട് വെട്ടിയത്. ഇയാളെ പൊലീസ് കസ്റ്റഡിയിലെടുത്തു. പട്രോളിങ്ങിനിടെയാണ് ആക്രമണമുണ്ടായത്. കൈക്കും ചൂണ്ടുവിരലിനും ഗുരുതരമായി പരിക്കേറ്റ അരുൺകുമാർ ആശുപത്രിയിലാണ്

വൈകീട്ട് ആറ് മണിയോടെയാണ് സംഭവം. സഹോദരനെ ആക്രമിച്ചുവെന്ന പേരിൽ സ്റ്റേഷനിൽ സുഗതനെതിരെ പരാതി ഉണ്ട്. ഈ പരാതിയിൽ ഇന്ന് വൈകീട്ട് ഇയാളെയും സഹോദരനെയും വിളിച്ച് സംസാരിച്ച് കാര്യങ്ങൾ തീർപ്പാക്കി വിട്ടിരുന്നു. ഇതിന് പിന്നാലെയാണ് സുഗതൻ വടിവാളുമായി വന്ന് എസ് ഐ അരുൺകുമാറിനെ ആക്രമിച്ചത്.

സ്റ്റേഷനിൽ വെച്ചും സുഗതൻ എസ് ഐ യോട് മോശമായി പെരുമാറിയിരുന്നുവെന്ന് കൂടെയുണ്ടായിരുന്ന പൊലീസുകാരൻ പറയുന്നു. പുറത്തിറങ്ങിയ ശേഷം വീട്ടിലെത്തി വടിവാളുമെടുത്ത് വന്ന സുഗതൻ എസ് ഐ പട്രോളിങിന് ഇറങ്ങുന്നത് നോക്കി ബൈക്കിലെത്തി ആക്രമിക്കുകയായിരുന്നു. സുഗതൻ മദ്യലഹരിയിലായിരുന്നു എന്നാണ് പൊലീസ് പറയുന്നത്.

Content Highlights : SI injured at Alappuzha