ഞങ്ങളുടേത് മാരിനേറ്റ് ചെയ്ത് വേവിച്ച ഇറച്ചിയായിരുന്നു; മുഹമ്മദ് റിയാസിന്റെ പോസ്റ്റിന് മറുപടിയുമായി ചാണ്ടി ഉമ്മന്‍

വിവാഹവാര്‍ഷിക ദിനത്തില്‍ മന്ത്രി പി എ മുഹമ്മദ് റിയാസ് ഭാര്യ വീണയ്ക്ക് വേണ്ടി കുറിച്ച ഫെയിസ്ബുക്ക് പോസ്റ്റിന് മറുപടിയുമായി ചാണ്ടി ഉമ്മന്‍. ഞങ്ങളുടേത് മാരിനേറ്റ് ചെയ്ത വേവിച്ച ഇറച്ചിയായിരുന്നു. അതുകൊണ്ട് കുഴപ്പമില്ല എന്ന് ചാണ്ടി ഉമ്മന്‍ കുറിച്ചു. നിലവിട്ട അസംബന്ധ പ്രചരണങ്ങള്‍ സൃഷ്ടിക്കാവുന്ന, ജീവനുള്ള മനുഷ്യന്റെ പച്ചമാംസം കടിച്ചു തിന്നുമ്പോള്‍ അനുഭവിക്കേണ്ട വേദനയെ വര്‍ഷങ്ങളായി പുഞ്ചിരിയോടെ നേരിടുന്ന എന്റെ പ്രിയപ്പെട്ടവള്‍ എന്നായിരുന്നു വീണയുടെ ചിത്രത്തിനൊപ്പം മുഹമ്മദ് റിയാസ് കുറിച്ചത്.

സ്വപ്‌ന സുരേഷ് ഉയര്‍ത്തിയ ആരോപണങ്ങളുടെ പശ്ചാത്തലത്തിലാണ് റിയാസിന്റെ പോസ്റ്റ്. മുഖ്യമന്ത്രിക്കും മകള്‍ വീണയ്ക്കുമെതിരെ സ്വപ്‌ന ആരോപണങ്ങള്‍ ഉയര്‍ത്തുകയും കോടതിയില്‍ രഹസ്യമൊഴി നല്‍കുകയും ചെയ്തിരുന്നു. ഇതിന് പിന്നാലെ പ്രതിപക്ഷം മുഖ്യമന്ത്രിക്കെതിരെ വന്‍ പ്രക്ഷോഭം നടത്തി വരികയാണ്. മുഖ്യമന്ത്രി രാജിവെക്കണമെന്ന ആവശ്യമാണ് കോണ്‍ഗ്രസും യുഡിഎഫ് ഘടകകക്ഷികളും ഉന്നയിക്കുന്നത്.

സോളാര്‍ വിവാദം ഉയര്‍ന്ന കാലത്ത് ഉമ്മന്‍ചാണ്ടിക്കും കുടുംബത്തിനും നേരെ ഉയര്‍ന്ന ആരോപണങ്ങളാണ് ചാണ്ടി ഉമ്മന്‍ തന്റെ പോസ്റ്റില്‍ സൂചിപ്പിക്കുന്നത്.

Content Highlights: Chandy Oommen, Oommen Chandy, P A Muhammed Riyaz, Veena Vijayan, Facebook