ഗൂഢാലോചന കേസ്; ചോദ്യം ചെയ്യലിനായി സരിത്ത് പൊലീസ് ക്ലബില്‍ ഹാജരായി

സ്വര്‍ണക്കടത്തു കേസിലെ പ്രതി സരിത്ത് ഗൂഢാലോചന കേസിലെ ചോദ്യം ചെയ്യലിനായി എറണാകുളം പൊലീസ് ക്ലബില്‍ ഹാജരായി. സ്വപ്‌ന സുരേഷിന്റെ ആരോപണങ്ങള്‍ക്കെതിരെ മുന്‍മന്ത്രി കെ ടി ജലീല്‍ നല്‍കിയ പരാതിയില്‍ എടുത്ത കേസിലാണ് പ്രത്യേക അന്വേഷണ സംഘം സരിത്തിനെ ചോദ്യം ചെയ്യുക.

മുഖ്യമന്ത്രിയെയും കുടുംബത്തിനെയും മറ്റ് ഉന്നതരെയടക്കം അപകീര്‍ത്തിപ്പെടുത്തുവെന്ന കെ ടി ജലീലിന്റെ പരാതിയുടെ അടിസ്ഥാനത്തില്‍ തിരുവനന്തപുരം കന്റോണ്‍മെന്റ് പൊലീസ് കേസെടുത്തിരുന്നു. കലാപശ്രമം, ഗൂഢാലോചന എന്നീ കുറ്റങ്ങള്‍ ചുമത്തിയാണ് സ്വപ്‌ന സുരേഷ്, പി സി ജോര്‍ജ്, എന്നിവര്‍ക്കെതിരെ കേസെടുത്തത്.

കോടതിയില്‍ നല്‍കിയ രഹസ്യമൊഴിയില്‍നിന്ന് പിന്മാറണമെന്ന് ആവശ്യപ്പെട്ട് തന്നെ സമീപിച്ചതായി സ്വപ്ന സുരേഷ് ആരോപിച്ച ഷാജ് കിരണിനെ പ്രത്യേക അന്വേഷണ സംഘം കഴിഞ്ഞ ദിവസം ചോദ്യം ചെയ്തിരുന്നു. ഇതിനു പിന്നാലെയാണ് സ്വര്‍ണക്കടത്ത് കേസിലെ പ്രതിയായ സരിത്തിനെ അന്വേഷണ ഉദ്യോഗസ്ഥര്‍ ചോദ്യം ചെയ്യുന്നത്.

Content Highlights – Gold Smuggling Case, Sarith