കടുവ റിലീസ് തിയതി മാറ്റി; ശത്രുവെത്ര ശക്തനാണോ, യുദ്ധവും കടുത്തതാകുമെന്ന് പൃഥ്വിരാജ്

പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന കടുവയുടെ റിലീസ് മാറ്റി. സോഷ്യല്‍ മീഡിയ പോസ്റ്റിലൂടെ പൃഥ്വിരാജ് തന്നെയാണ് ഇക്കാര്യം അറിയിച്ചത്. ജൂണ്‍ 30ന് ചിത്രം റിലീസ് ചെയ്യുമെന്നായിരുന്നു നേരത്തേ അണിയറ പ്രവര്‍ത്തകര്‍ അറിയിച്ചിരുന്നത്. ഒരാഴ്ചയ്ക്ക് ശേഷം 7-ാം തിയതി കടുവ റിലീസ് ചെയ്യുമെന്ന് പോസ്റ്റില്‍ പൃഥ്വി വ്യക്തമാക്കി.

സ്വപ്‌നങ്ങള്‍ എത്ര വലുതാണോ, തടസങ്ങളും അത്രയും വലുതാകും. ശത്രു എത്ര ശക്തനാണോ അത്രയും കടുത്തതാകും യുദ്ധമെന്നും പോസ്റ്റില്‍ താരം കുറിച്ചു. അപ്രതീക്ഷിതമായ ചില സാഹചര്യങ്ങള്‍ മൂലം റിലീസ് മാറ്റുന്നുവെന്നാണ് വിശദീകരണം. ഷെഡ്യൂള്‍ അനുസരിച്ചുള്ള പ്രമോഷണല്‍ പരിപാടികള്‍ തുടരുമെന്നും ലോകമെമ്പാടുമുള്ള ആരാധകരോടും വിതരണക്കാരോടും തീയേറ്റര്‍ ഉടമകളോടും മാപ്പു ചോദിക്കുന്നതായും താരം പറഞ്ഞു.

സിംഹാസനം എന്ന ചിത്രത്തിന് ശേഷം ഷാജി കൈലാസും പൃഥ്വിരാജും ഒരുമിക്കുന്ന ചിത്രമാണ് കടുവ. ജിനു വി. ഏബ്രഹാമാണ് തിരക്കഥ രചിച്ചിരിക്കുന്നത്.

Content Highlights: Kaduva Movie, Prithviraj, Release, Malayalam cinema