‘അപ്പൻ’ വൻതുകക്ക് സോണി ലിവ് ന്

സണ്ണി വെയ്ൻ നായകനാകുന്ന ‘അപ്പൻ’ ഗംഭീര റിലീസിന് ഒരുങ്ങുന്നു. ടൈനി ഹാൻസ് പ്രൊഡക്ഷൻസിന്റെ ബാനറിൽ മജു സംവിധാനം ചെയ്ത ചിത്രം നിർമ്മിച്ചിരിക്കുന്നത് ജോസ്കുട്ടി മഠത്തിൽ, രഞ്ജിത്ത് മണമ്പ്രക്കാട്ട്, എന്നിവർ ചേർന്നാണ്. പ്രിവ്യൂ ഷോയിൽ പങ്കെടുത്ത ചലച്ചിത്ര പ്രതിഭകൾ ചർച്ചാവിഷയമാക്കിയ ചിത്രം മലയാള സിനിമ ലോകത്തിന് ഏറെ പ്രതീക്ഷ നൽകുന്നു. ‘അപ്പൻ’ ൻ്റെ പ്രദർശനാവകാശം വൻ തുകക്കാണ് പ്രമുഖ ഒടിടി പ്ലാറ്റ്ഫോമായ സോണി ലിവ് സ്വന്തമാക്കിയിരിക്കുന്നത്. സണ്ണി വെയ്ൻ പുതിയ രൂപത്തിലും ഭാവത്തിലുമാണ് ‘അപ്പൻ’ ​നിൽ എത്തുന്നത്. ചിത്രത്തിന്റെ പോസ്റ്ററുകളും അതുതന്നെയാണ് സൂചിപ്പിക്കുന്നത്. ഇമോഷണൽ ഡ്രാമ വിഭാഗത്തിൽ പെടുന്ന ചിത്രം അച്ഛൻ-മകൻ ബന്ധത്തിൻ്റെ പ്രത്യേകതയ്ക്ക് ഒപ്പം ഒരു കുടുംബത്തിന്റെ മുഴുവൻ കഥയും കൂടിയാണ് പങ്കുവയ്ക്കുന്നത്. മജുവും ആർ ജയകുമാറും ചേർന്നാണ് കഥ, തിരക്കഥ, സംഭാഷണം ഒരുക്കിയിരിക്കുന്നത്. ഇതേ നിർമ്മാതക്കളുടെ ‘വെള്ളം’ എന്ന ചിത്രത്തിന് വൻ സ്വീകാര്യത ലഭിച്ചിരുന്നു.

അലൻസിയർ ലേ ലോപ്പസാണ് ‘അപ്പൻ’ നിലെ ടൈറ്റിൽ കഥാപാത്രത്തെ അവതരിപ്പിക്കുന്നത്. നീണ്ട ഇടവേളയ്ക്ക് ശേഷം അനന്യ സിനിമയിലേക്ക് തിരിച്ചെത്തുന്നു എന്ന പ്രത്യേകതയും ചിത്രത്തിനുണ്ട്. ഗ്രേസ് ആന്റണിയും സുപ്രധാന കഥാപാത്രത്തെ അവതരിപ്പിക്കുന്നുണ്ട്. സണ്ണി വെയ്നും ഗ്രെയ്‌സ് ആന്റണിയും അലൻസിയർന്റെ മക്കളായെത്തുമ്പോൾ അനന്യയും വിജിലേഷും മരുമക്കളുടെ വേഷവും പോളി വത്സൻ അലൻസിയറുടെ ഭാര്യയുടെ വേഷവും കൈകാര്യം ചെയ്തിരിക്കുന്നു. തൊടുപുഴയായിരുന്നു പ്രധാന ലൊക്കേഷൻ.

അരയ്ക്ക് കീഴെ തളർച്ച ബാധിച്ച് കട്ടിലിൽ വിശ്രമജീവിതത്തിൽ കഴിയുന്ന അപ്പന്റെ സ്വത്തിനായി അപ്പൻ്റെ മരണം കാത്ത് കഴിയുന്ന ഭാര്യയുടേയും മക്കളുടെയും മരുമക്കളുടെയും കുടുംബ ജീവിതത്തിലെ കാഴ്ചകളാണ് ചിത്രത്തിന്റെ പ്രമേയം.

പപ്പു, വിനോദ് ഇല്ലമ്പള്ളി എന്നിവർ ഛായാഗ്രഹണവും കിരൺ ദാസ് എഡിറ്റിംഗും നിർവഹിച്ച ചിത്രത്തിന് ഡോൺ വിൻസെന്റാണ് സംഗീതവും പശ്ചാത്തല സം​ഗീതവും ഒരുക്കിയിരിക്കുന്നത്. അൻവർ അലി, വിനായക് ശശികുമാർ എന്നിവരുടെതാണ് വരികൾ.

Content Highlights: Appan Movie to Sony liv