ഗസല്‍ ഗായകരായ റാസബീഗം സിനിമയില്‍ പാടുന്നു; ആദ്യഗാനം പുറത്തിറക്കി മമ്മൂട്ടി

ഡി ഗ്രൂപ്പിന്റെ ബാനറില്‍ മാനുവല്‍ ക്രൂസ് ഡാര്‍വിന്‍ നിര്‍മ്മിച്ച ഏറ്റവും പുതിയ ചിത്രമായ ‘ടു മെന്‍’ ലെ ആദ്യ ഗാനം പുറത്തിറങ്ങി. പ്രശസ്ത ഗസല്‍ ഗായകരായ റാസാബീഗം പാടിയ ഗാനം നടന്‍ മമ്മൂട്ടി തന്റെ ഫേസ്ബുക്ക് പേജിലൂടെ പുറത്തിറക്കി. റാസാബീഗം ആദ്യമായാണ് സിനിമയ്ക്ക് വേണ്ടി പാടുന്നത്. അവരുടെ ‘സലാം ചൊല്ലി പിരിയും മുന്‍പേ’ എന്ന ഹിറ്റ് ഗാനമാണ് സിനിമക്ക് വേണ്ടി വീണ്ടും ഒരുക്കിയത്. റഫീഖ് അഹമ്മദിന്റെ വരികള്‍ക്ക് ആനന്ദ് മധുസൂദനന്‍ സംഗീതം നല്‍കുന്നു.

ഗാനത്തില്‍ റാസാബീഗം ഗാനരംഗങ്ങളില്‍ പാടി അഭിനയിച്ചിട്ടുമുണ്ട്. ഇര്‍ഷാദ് അലി, സംവിധായകന്‍ എംഎ നിഷാദ് എന്നിവര്‍ കേന്ദ്രകഥാപാത്രങ്ങളാകുന്ന ചിത്രത്തില്‍ രണ്‍ജി പണിക്കര്‍, ബിനു പപ്പു, ലെന, സോഹന്‍ സീനുലാല്‍, അനുമോള്‍, ഡോണി ഡാര്‍വിന്‍, ആര്യ, കൈലാഷ്, സുധീര്‍ കരമന, മിഥുന്‍ രമേഷ്, അര്‍ഫാസ്, സുനില്‍ സുഗത, സാദിഖ് എന്നിവരാണ് മറ്റു കഥാപാത്രങ്ങള്‍.

സിനിമയുടെ ചിത്രീകരണം ഭൂരിഭാഗവും യുഎയിലാണ് ചിത്രീകരിച്ചിരിക്കുന്നത്. സിനിമയുടെ തിരക്കഥ മുഹാദ് വെമ്പായത്തിന്റേതാണ്. തമിഴിലെ പ്രസിദ്ധ ക്യാമറാമാനായ സിദ്ധാര്‍ത്ഥ് രാമസ്വാമിയാണ് സിനിമാറ്റോഗ്രഫി നിര്‍വ്വഹിച്ചത്. ചിത്രം ഉടന്‍ തീയേറ്ററുകളിലെത്തും.

Content Highlights – Actor Mammootty released the song sung by popular ghazal singers Razabeegum through his Facebook page