കൊച്ചി നഗരത്തില്‍ വീണ്ടും കൊലപാതകം; സൗത്ത് പാലത്തിന് സമീപം യുവാവിനെ കുത്തിക്കൊന്നു

കൊച്ചി നഗരത്തില്‍ വീണ്ടും കൊലപാതകം. ഞായറാഴ്ച പുലര്‍ച്ചെ രണ്ടു മണിയോടെ സൗത്ത് പാലത്തിന് സമീപം കളത്തിപ്പറമ്പ് റോഡിലാണ് സംഭവം. വരാപ്പുഴ സ്വദേശിയായ ശ്യാം (33) ആണ് മരിച്ചത്. സംഘര്‍ഷത്തിനിടെയാണ് കൊലപാതകം. അരുണ്‍ എന്നയാള്‍ക്ക് പരിക്കേറ്റു. മറ്റൊരാള്‍ക്കും പരിക്കേറ്റതായി വിവരമുണ്ട്. ഇയാള്‍ ജനറല്‍ ആശുപത്രിയില്‍ ചികിത്സ തേടിയശേഷം മുങ്ങിയതായാണ് സൂചന.

ബൈക്കിലെത്തിയ മൂന്നംഗ സംഘമാണ് കൊല നടത്തിയത്. സംഭവത്തില്‍ പോലീസ് അന്വേഷണം ആരംഭിച്ചു. കഴിഞ്ഞ ബുധനാഴ്ച കൊച്ചി നഗരത്തില്‍ കൊല്ലം സ്വദേശിയായ യുവാവ് കുത്തേറ്റ് മരിച്ചിരുന്നു. എറണാകുളം ടൗണ്‍ഹാളിന് സമീപമുള്ള റെസ്റ്റോറന്റിലുണ്ടായ വാക്കുതര്‍ക്കം കൊലയില്‍ കലാശിക്കുകയായിരുന്നു.

കൊല്ലം സ്വദേശി എഡിസണ്‍ ആണ് കൊല്ലപ്പെട്ടത്. മുളവുകാട് സ്വദേശി സുരേഷ് എന്നയാളാണ് എഡിസണെ കുത്തിയത്. ഹോട്ടലില്‍ വെച്ചുണ്ടായ തര്‍ക്കത്തിനിടെ സുരേഷ് മദ്യക്കുപ്പി പൊട്ടിച്ച് ഭക്ഷണം കഴിച്ചുകൊണ്ടിരിക്കുകയായിരുന്ന എഡിസന്റെ കഴുത്തില്‍ കുത്തുകയായിരുന്നു.