പിഞ്ചുകുഞ്ഞുമായി പൊലീസുകാരനും ഭാര്യയും 12ാം നിലയില്‍ നിന്നും ചാടി ആത്മഹത്യ ചെയ്തു

ഫ്‌ലാറ്റിന്റെ പന്ത്രണ്ടാം നിലയില്‍ നിന്നും പിഞ്ചുകുഞ്ഞുമായി പൊലീസുകാരനും ഭാര്യയും ചാടി ആത്മഹത്യ ചെയ്തു. അഹമ്മദാബാദിലെ വസ്ത്രാപൂര്‍ സ്‌റ്റേഷനിലെ കോണ്‍സ്റ്റബിളായ കുല്‍ദീപ് സിങ്ങ് യാദവ്, ഭാര്യ റിദ്ദി. മൂന്ന് വയസുകാരിയായ മകള്‍ എന്നിവരാണ് മരിച്ചത്. ആത്മഹത്യയ്ക്ക് മുന്‍പ് ഇരുവരും തമ്മില്‍ വഴക്കിട്ടിരുന്നതായി പൊലീസിന്റെ പ്രാഥമിക അന്വേഷണത്തില്‍ കണ്ടെത്തി.

കുല്‍ദീപ് ഭാര്യയ്ക്കും മകള്‍ക്കുമൊപ്പം ഗോട്ടാ പ്രദേശത്തെ ഫ്‌ലാറ്റിലെ 12ാം നിലയിലാണ് താമസിച്ചിരുന്നത്. പുലര്‍ച്ചെ ഒന്നരയോടെയാണ് ദമ്പതികള്‍ മകളോടൊപ്പം കെട്ടിടത്തില്‍ നിന്നും ചാടിയതെന്ന് അയല്‍വാസികള്‍ പറഞ്ഞു. മൂന്നുപേരും സംഭവസ്ഥലത്തുവച്ചു തന്നെ മരിച്ചു. ദമ്പതികള്‍ തമ്മില്‍ വഴക്കിടല്‍ പതിവാണെന്നും അതേ ഫ്‌ലാറ്റില്‍ താമസിക്കുന്ന യാദവിന്റെ സഹോദരി അഭിപ്രായപ്പെട്ടതായി പൊലീസ് പറഞ്ഞു.

റിദ്ദിയാണ് ആദ്യം ചാടിയതെന്നും പിന്നാലെ കുല്‍ദീപ് മകളെയും എടുത്ത് കെട്ടിടത്തില്‍ നിന്ന് ചാടുകയായിരുന്നെന്ന് സമീപവാസികളിലൊരാള്‍ പറഞ്ഞു. മൃതദേഹങ്ങള്‍ ഫോറന്‍സിക് പരിശോധനയ്ക്ക് അയച്ചതായും സംഭവത്തില്‍ അന്വേഷണം പുരോഗമിക്കുകയാണെന്നും പൊലീസ് വ്യക്തമാക്കി.