നിയന്ത്രണംവിട്ട കാര്‍ കിണറ്റില്‍ വീണ് മൂന്ന് വിദ്യാര്‍ത്ഥികള്‍ മരിച്ചു

കാര്‍ നിയന്ത്രണംവിട്ട് കിണറ്റില്‍ വീണ് മൂന്ന് വിദ്യാര്‍ത്ഥികള്‍ മരിച്ചു. വെള്ളിയാഴ്ച പുലര്‍ച്ചെ ശിരുവാണി റോഡില്‍ തൊണ്ടാമുത്തൂര്‍ തെന്നനല്ലൂര്‍ മാരിയമ്മന്‍ കോവിലിന് സമീപമായിരുന്നു അപകടം. കോയമ്പത്തൂര്‍ വടവള്ളി സ്വദേശികളായ ആദേഷ്, രവികൃഷ്ണന്‍, നന്ദന്‍ എന്നിവരാണ് മരിച്ചത്.

കോയമ്പത്തൂരിലെ സ്വകാര്യ കോളേജിലെ ബി.എസ്.സി. വിദ്യാര്‍ഥികളാണ് ഇവര്‍. എല്ലാവരും 18 വയസ് മാത്രം പ്രായമുള്ളവരാണ്. 150 അടിയോളം താഴ്ചയുള്ള കിണറ്റിലേക്കാണ് കാര്‍ പതിച്ചത്. നാലുപേര്‍ കാറിലുണ്ടായിരുന്നു. ഇവരില്‍ ഒരാള്‍ രക്ഷപ്പെട്ടു. റോഷന്‍ എന്നയാളാണ് രക്ഷപ്പെട്ടത്.

ഓണാഘോഷം കഴിഞ്ഞ് പുലര്‍ച്ചെ വീട്ടിലേക്ക് മടങ്ങുന്നതിനിടെയാണ് അപകടം. മരിച്ച വിദ്യാര്‍ത്ഥികള്‍ മൂന്നു പേരും കാറിനുള്ളില്‍ കുടുങ്ങിക്കിടക്കുകയായിരുന്നു.