ഹോളിവുഡിന്റെ ചിരി മാഞ്ഞു; ഹാസ്യ നടനും രാഷ്ട്രീയനേതാവുമായ രാജു ശ്രീവാസ്തവ അന്തരിച്ചു

മുംബൈ: ഹാസ്യ നടനും രാഷ്ട്രീയനേതാവുമായ രാജു ശ്രീവാസ്തവ (58) അന്തരിച്ചു. ജിമ്മില്‍ കുഴഞ്ഞു വീണതിനെ തുടര്‍ന്ന് അദ്ദേഹത്തെ ആശുപത്രിയില്‍ പ്രവേശിപ്പിച്ച് ആന്‍ജിയോപ്ലാസ്റ്റി ചെയ്തിരുന്നു. തുടര്‍ന്ന് കഴിഞ്ഞ നാല്‍പ്പത് ദിവസങ്ങളായി എയിംസില്‍ ചികിത്സയിലായിരുന്നു. ആരോ​ഗ്യ നിലയിൽ നേരിയ പുരോ​ഗതി കാണിച്ചിരുന്നു. ബുധനാഴ്ച രാവിലെ പത്തേ മുക്കാലോടു കൂടിയായിരുന്നു അന്ത്യം.

1963 ല്‍ ഉത്തര്‍ പ്രദേശിലെ കാണ്‍പൂരിലാണ് രാജു ശ്രീവാസ്തവയുടെ ജനനം. ദ് ​ഗ്രേറ്റ് ഇന്ത്യന്‍ ലാഫ്റ്റര്‍ ചാലഞ്ച് എന്ന ടെലിവിഷന്‍ സ്റ്റാന്‍ഡ് അപ്പ് കോമഡി പരിപാടിയിലൂടെ 2005 ല്‍ ആണ് രാജു ശ്രീവാസ്തവ ആദ്യമായി പ്രേക്ഷകശ്രദ്ധയിലേക്ക് എത്തുന്നത്. ഈ ഷോയില്‍ രണ്ടാം റണ്ണര്‍ അപ്പ് ആയിരുന്നു രാജു. ടെലിവിഷന്‍ റിയാലിറ്റി ഷോ ബി​ഗ് ബോസ് ഹിന്ദി സീസണ്‍ 3 മത്സരാര്‍ഥിയായും പങ്കെടുത്തിട്ടുണ്ട്.

നിരവധി കോമഡി ഷോകളുടെ ഭാഗമായിട്ടുള്ള പ്രശസ്ത ഹാസ്യനടനാണ് രാജു ശ്രീവാസ്തവ. ദി ഗ്രേറ്റ് ഇന്ത്യൻ ലാഫർ ചലഞ്ച്, കോമഡി സർക്കസ്, ദി കപിൽ ശർമ്മ ഷോ, ശക്തിമാൻ തുടങ്ങിയവയുടെ ഭാഗമായിരുന്നു. മൈനേ പ്യാർ കിയ, തേസാബ്, ബാസിഗർ തുടങ്ങിയ ബോളിവുഡ് ചിത്രങ്ങളിലും അഭിനയിച്ചു.

2010 നു ശേഷം രാഷ്ട്രീയ പ്രവര്‍ത്തനത്തിലിറങ്ങിയിരുന്നു. സമാജ്‍വാദി പാര്‍ട്ടി ടിക്കറ്റില്‍ 2014 ലോക്സഭാ തെരഞ്ഞെടുപ്പില്‍ കാണ്‍പൂരില്‍ നിന്ന് മത്സരിക്കാന്‍ തീരുമാനിച്ചെങ്കിലും പിന്നീട് പിന്‍തിരിഞ്ഞു. പിന്നീട് ബിജെപിയില്‍ ചേര്‍ന്നു. സ്വച്ഛ് ഭാരത് അഭിയാന്‍റെ പ്രചരന പരിപാടികളില്‍ പങ്കെടുത്തിരുന്നു.

ഉത്തര്‍ പ്രദേശ് സര്‍ക്കാരിന്‍റെ ഫിലിം ഡെവലപ്മെന്‍റ് കൗണ്‍സിലിന്‍റെ ചെയര്‍മാന്‍ ആയിരുന്നു. ശിഖയാണ് ഭാര്യ. അന്ദര, ആയുഷ്മാന്‍ എന്നിവരാണ് മക്കൾ.

Content Highlights – Comedian and politician Raju Srivastava passed away