കരിപ്പൂരില്‍ ഒരു കോടി രൂപയുടെ സ്വര്‍ണ്ണവുമായി പത്തൊന്‍പതുകാരി പിടിയില്‍; സ്വര്‍ണ്ണം അടിവസ്ത്രത്തില്‍ തുന്നിച്ചേര്‍ത്ത നിലയില്‍

ഒരു കോടി രൂപയുടെ സ്വര്‍ണ്ണം കടത്താന്‍ ശ്രമിച്ച പത്തൊന്‍പതുകാരി കരിപ്പൂരില്‍ പിടിയില്‍. ദുബായില്‍ നിന്നെത്തിയ കാസര്‍കോട് സ്വദേശിനി ഷഹലയാണ് പോലീസിന്റെ പിടിയിലായത്. കസ്റ്റംസ് പരിശോധനയ്ക്ക് ശേഷമാണ് പോലീസ് ഷഹലയെ പിടികൂടിയത്. 1884 ഗ്രാം സ്വര്‍ണ്ണം അടിവസ്ത്രത്തില്‍ തുന്നിച്ചേര്‍ത്ത നിലയിലായിരുന്നു.

ഷഹലയുടെ പക്കല്‍ സ്വര്‍ണ്ണമുണ്ടെന്ന് പോലീസിന് വിവരം ലഭിച്ചിരുന്നു. ഇതേത്തുടര്‍ന്ന് പോലീസ് ചോദ്യം ചെയ്‌തെങ്കിലും സ്വര്‍ണ്ണക്കടത്തുമായി ബന്ധമൊന്നും ഇല്ലെന്നായിരുന്നു യുവതി പറഞ്ഞത്. തുടര്‍ന്ന് ദേഹപരിശോധന നടത്തിയപ്പോഴാണ് സ്വര്‍ണ്ണം കണ്ടെത്തിയത്. പോലീസ് കസ്റ്റംസിനെ വിവരം അറിയിച്ചു.