അബ്ദുല്ലയായി ഈജിപ്ഷ്യന്‍ നടന്‍ ഇസ്ലാം അബ്ദല്‍ഗവ്വാദ്; ആയിഷയിലെ ആദ്യ ക്യാരക്ടര്‍ പോസ്റ്റര്‍ പുറത്ത്

മഞ്ജു വാര്യര്‍ പ്രധാന വേഷത്തില്‍ എത്തുന്ന ആയിഷ എന്ന ചിത്രത്തിന്റെ ആദ്യ ക്യാരക്ടര്‍ പോസ്റ്റര്‍ പുറത്ത്. ബഹുഭാഷാ ചിത്രമായ ആയിഷയിലെ അബ്ദുല്ല എന്ന കഥാപാത്രത്തിന്റെ പോസ്റ്ററാണ് അവതരിപ്പിച്ചത്. ഇസ്ലാം അബ്ദുല്‍ഗവ്വാദ് എന്ന ഈജിപ്ഷ്യന്‍ നടനാണ് അബ്ദുല്ലയായി വേഷമിട്ടിരിക്കുന്നത്. സൗദി അറേബ്യ, ഇറാന്‍, തുര്‍ക്കി, ഈജിപ്ത്, യുഎഇ, പാകിസ്ഥാന്‍ എന്നീ രാജ്യങ്ങളില്‍ നിന്നുള്ളവരും മലയാളികളും അടക്കം രണ്ടായിരത്തോളം പേരാണ് യുഎഇയില്‍ വെച്ച് നടന്ന ചിത്രത്തിന്റെ ഓഡിഷനില്‍ അപേക്ഷിച്ചത്.

ചില കഥാപാത്രങ്ങളിലേക്ക് പെട്ടെന്ന് തന്നെ അഭിനേതാക്കളെ കണ്ടെത്താന്‍ കഴിഞ്ഞെങ്കിലും അബ്ദുല്ല എന്ന കഥാപാത്രത്തിലേക്ക് ഒരാളെ സെലക്റ്റ് ചെയ്യുക എന്നത് എളുപ്പമായിരുന്നില്ലെന്ന് അണിയറപ്രവര്‍ത്തകര്‍ പറയുന്നു. ഒരേ സമയം രൂപം കൊണ്ടും അഭിനയമികവ് കൊണ്ടും ഇംഗ്ലീഷ് – അറബിക് ഭാഷ ഉപയോഗം കൊണ്ടും ഒത്തു വരുന്ന ഒരാളാകണം അബ്ദുല്ല. വിവിധ രാജ്യങ്ങളില്‍ നിന്നുള്ളവര്‍അബ്ദുല്ലയ്ക്കു വേണ്ടി ഓഡിഷനിലെത്തി. പക്ഷെ ഇസ്ലാം അബ്ദുല്‍ഗവ്വാദിനോളം അബ്ദുല്ലയാകാന്‍ അനുയോജ്യനായ ഒരാള്‍ അതില്‍ ഇല്ലായിരുന്നു. അനായസ അഭിനയത്തികവ് കൊണ്ട് ആയിഷയില്‍ ഇസ്ലാം തലയെടുപ്പോടെ നിറഞ്ഞ് നില്‍ക്കുന്നുണ്ട്. ഉറപ്പായും ആയിഷ കണ്ടിറങ്ങുമ്പോള്‍ അബ്ദുള്ളയും നമുക്കുള്ളില്‍ കയറിയിട്ടുണ്ടാകുമെന്ന് അണിയറ പ്രവര്‍ത്തകര്‍ വ്യക്തമാക്കുന്നു.

ആമിര്‍ പള്ളിക്കല്‍ സംവിധാനം ചെയ്ത ചിത്രം പൂര്‍ണ്ണമായും യുഎഇയില്‍ ചിത്രീകരണം പൂര്‍ത്തിയാക്കുന്ന ആദ്യ മലയാള ചിത്രമാണ്. സക്കറിയ നിര്‍മിച്ച ചിത്രത്തിന്റെ രചന നിര്‍വഹിച്ചിരിക്കുന്നത് ആഷിഫ് കക്കോടിയാണ്. വിഷ്ണു ശര്‍മയാണ് ഛായാഗ്രഹണം. എം ജയചന്ദ്രന്‍ സംഗീതവും പ്രഭുദേവ കോറിയോഗ്രാഫിയും നിര്‍വഹിച്ചിരിക്കുന്നു. ചിത്രം ജനുവരി 20ന് തീയേറ്ററുകളിലെത്തും.