കൊച്ചിയില്‍ നിന്ന് നായ്ക്കുട്ടിയെ മോഷ്ടിച്ച മോഷ്ടിച്ച യുവാവിനെയും യുവതിയെയും കര്‍ണാടകയില്‍ നിന്ന് പിടികൂടി

കൊച്ചി, നെട്ടൂരിലെ പെറ്റ് ഷോപ്പില്‍ നിന്ന് നായ്ക്കുട്ടിയെ മോഷ്ടിച്ച സംഭവത്തില്‍ പ്രതികള്‍ പിടിയില്‍. കര്‍ണാടക ഹോസ്ദുര്‍ഗ് ഷിമോഗ സ്വദേശികളും എന്‍ജിനീയറിംഗ് വിദ്യാര്‍ത്ഥികളുമായ നിഖില്‍(23), ശ്രേയ(23) എന്നിവരാണ് പനങ്ങാട് പോലീസിന്റെ പിടിയിലായത്. ഇവരില്‍ നിന്ന് മോഷണം പോയ നായക്കുട്ടിയെയും കണ്ടെത്തി. സിസിടിവി ദൃശ്യങ്ങളും മറ്റ് വിവരങ്ങളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെ കണ്ടെത്തിയത്.

ശനിയാഴ്ച രാത്രി 7 മണിയോടെയാണ് സംഭവമുണ്ടായത്. കൊച്ചിയില്‍ മുറിയെടുത്ത് താമസിക്കുകയായിരുന്ന യുവാവും യുവതിയും പൂച്ചക്കുട്ടിയെ വാങ്ങാനെന്ന വ്യാജേന നെട്ടൂരിലെ ഷോപ്പിലെത്തുകയും നായ്ക്കുട്ടിയെ മോഷ്ടിച്ച് ഹെല്‍മെറ്റിനുള്ളില്‍ വെച്ച് കടന്നുകളയുകയുമായിരുന്നു. വിശദാന്വേഷണത്തില്‍ കൊച്ചിയിലെ മറ്റൊരു പെറ്റ് ഷോപ്പില്‍ നിന്ന് ഇവര്‍ ഡോഗ് ഫുഡ് മോഷ്ടിച്ചതായും കണ്ടെത്തി.

കര്‍ണാടകയിലെ കാര്‍ഖലയില്‍ നിന്നാണ് പ്രതികളെ പിടികൂടിയത്. ഇവരെ കൊച്ചിയില്‍ എത്തിച്ച് റിമാന്‍ഡ് ചെയ്യുമെന്ന് പോലീസ് അറിയിച്ചു.