കോട്ടയത്തു നിന്ന് കാണാതായ പോലീസ് ഉദ്യോഗസ്ഥന്‍ തമിഴ്‌നാട്ടിലുള്ളതായി വിവരം

കോട്ടയത്തു നിന്ന് കാണാതായ പോലീസ് ഉദ്യോഗസ്ഥന്‍ മുഹമ്മദ് ബഷീര്‍ തമിഴ്‌നാട്ടിലുള്ളതായി വിവരം. കോട്ടയം ഈസ്റ്റ് പോലീസ് സ്‌റ്റേഷനില്‍ നിന്നാണ് ബഷീറിനെ കാണാതായത്. ഇയാള്‍ തമിഴ്‌നാട്ടിലെ ഏര്‍വാടി പള്ളിയിലുള്ളതായും കുടുംബവുമായി ബന്ധപ്പെട്ടെന്നും പോലീസ് അറിയിച്ചു. രണ്ടു ദിവസത്തിനുള്ളില്‍ തിരിച്ചെത്തുമെന്ന് ബഷീര്‍ അറിയിച്ചതായും പോലീസ് പറഞ്ഞു.

ഈസ്റ്റ് പോലീസ് സ്‌റ്റേഷനില്‍ സിപിഒ ആയ ബഷീറിനെ ശനിയാഴ്ച പുലര്‍ച്ചെ അഞ്ചു മണിയോടെയാണ് കാണാതായത്. വാറണ്ട് പ്രതിയെ പിടികൂടാന്‍ പോകാനിരിക്കെയാണ് സംഭവം. ബഷീര്‍ കോട്ടയത്തു നിന്നുള്ള ട്രെയിനില്‍ കയറിയതായി വിവരം ലഭിച്ചിരുന്നു.

ലോങ്ങ് പെന്‍ഡിങ് വാറണ്ട് കേസിലെ പ്രതികളെ പിടിക്കണമെന്ന് ഉന്നത ഉദ്യോഗസ്ഥന്‍ നിര്‍ദേശിച്ചിരുന്നു. അമ്പതോളം എല്‍.പി. വാറണ്ട് കേസുകള്‍ ബഷീറിന്റെ ചുമതലയില്‍ ഉണ്ടായിരുന്നുവെന്നാണ് ലഭിക്കുന്ന വിവരം. അമിത ജോലിഭാരം മൂലം ബഷീര്‍ സമ്മര്‍ദ്ദത്തിലായിരുന്നെന്നും ആരോപണമുണ്ട്.