കെഎസ്ആര്‍ടിസി ബസില്‍ ലൈംഗികാതിക്രമം; മലപ്പുറം സ്വദേശി തൊടുപുഴയില്‍ പിടിയില്‍

കെഎസ്ആര്‍ടിസി ബസില്‍ ലൈംഗികാതിക്രമം നടത്തിയ മലപ്പുറം സ്വദേശി പിടിയില്‍. കാണ്ടോട്ടി സ്വദേശി മുസമ്മില്‍ പി. ആണ് പിടിയിലായത്. എറണാകുളം- തൊടുപുഴ റൂട്ടില്‍ സര്‍വീസ് നടത്തുന്ന കെ.എസ്.ആര്‍.ടി.സി. ബസിനുള്ളില്‍ തൊടുപുഴയ്ക്ക് സമീപം വാഴക്കുളത്ത് വെച്ചായിരുന്നു സംഭവം.

യുവതി പരാതിപ്പെട്ടതിനെത്തുടര്‍ന്ന് ബസ് തൊടുപുഴ പോലീസ് സ്റ്റേഷനില്‍ എത്തിച്ചു. ബസിന്റെ മുന്നില്‍ ഇടതുവശത്തെ സീറ്റില്‍ ഇരിക്കുകയായിരുന്നു യുവതി. പിന്നിലെ സീറ്റിലിരിക്കുകയായിരുന്ന പ്രതി യുവതി ഇരിക്കുന്ന സീറ്റിലേക്ക് മാറിയിരിക്കുകയും യുവതിയുടെ ശരീരത്തില്‍ കയറിപ്പിടിക്കുകയുമായിരുന്നു.

ഉറക്കത്തിലായിരുന്ന യുവതി ഞെട്ടിയുണരുകയും വലതുവശത്തെ സീറ്റിലേക്ക് മാറിയിരിക്കുകയും ചെയ്തു. പ്രതി ആ സീറ്റിലും എത്തി ഉപദ്രവിക്കാന്‍ ശ്രമിച്ചു. ഇതോടെ ബസ് ജീവനക്കാര്‍ ഇടപെട്ടു. യുവതി പരാതിപ്പെട്ടതോടെ ബസ് തൊടുപുഴ പോലീസ് സ്‌റ്റേഷനില്‍ എത്തിക്കുകയായിരുന്നു.