വിശ്വസുന്ദരി പട്ടം സ്വന്തമാക്കി നിക്വാരാഗയുടെ ഷെന്നിസ് പാലാശിയോസ്

72ാമത് വിശ്വസുന്ദരി മത്സരത്തില്‍ കിരീടം ചൂടി നിക്വരാഗയുടെ ഷെന്നിസ് പാലാശിയോസ്. സാന്‍ സാല്‍വഡോറിലെ ജോസ് അഡോള്‍ഫോ പിന്നേഡ അറീനയില്‍ നടന്ന പരിപാടിയിലാണ് 23കാരിയായ ഷെന്നിസ് വിജയയിയായത്.

മുന്‍ വിശ്വസുന്ദരി അമേരിക്കയുടെ ബോണി ഗബ്രിയേല്‍ ഷെന്നിസിനെ കിരീടം അണിയിച്ചു. മോഡലും ടിവി അവതാരകയുമാണ് ഷെന്നിസ്. നവംബര്‍ 19 ന് നടന്ന മിസ്സ് യൂണിവേഴ്‌സ് 2023 മത്സരത്തിലെ ശ്രദ്ധേയമായ വിജയത്തിന് മുമ്ബ്, മിസ് വേള്‍ഡ് 2021 മത്സരത്തില്‍ നിക്കരാഗ്വയെ, മിസ് വേള്‍ഡ് നിക്കരാഗ്വ 2020 ആയി പ്രതിനിധീകരിച്ച്‌ പാലാശിയോസ് ആഗോള വേദിയില്‍ തന്റെ കഴിവ് പ്രകടിപ്പിച്ചിട്ടുണ്ട്. ഇന്‍സ്റ്റഗ്രാമിലും ടിക് ടോകിലും ലക്ഷണകണക്കിന് ആരാധകരുള്ള താരം കൂടിയാണ് പാലാശിയോസ്. കമ്മ്യൂണിക്കേഷന്‍സില്‍ ബിരുദമുള്ള ഷെന്നീസ് മാനസികാരോഗ്യ രംഗത്തും തന്റേതായ ഇടം സൃഷ്ടിച്ചിട്ടുണ്ട്. ഉത്കണ്ഠാരോഗമുള്ള ഷെന്നിസ് അണ്ടര്‍സ്റ്റാന്റ് യുവര്‍ മൈന്‍ഡ് എന്ന പേരില്‍ ഒരു പ്രൊജക്ടും ആരംഭിച്ചിട്ടുണ്ട്.