കേരളത്തിലെ സി.പി.എമ്മിനെ പുകഴ്ത്തി ഗെഹ്ലോട്ട്: ‘നല്ല ഭരണം കാഴ്ചവെച്ചത് കൊണ്ടാണ് തുടര്‍ഭരണം ലഭിച്ചത്’

കേരളത്തില്‍ സി.പി.എം തുടര്‍ഭരണത്തിലേറിയത് പോലെ രാജസ്ഥാനില്‍ കോണ്‍ഗ്രസ് സര്‍ക്കാര്‍ വീണ്ടും അധികാരത്തിലെത്തുമെന്ന് മുഖ്യമന്ത്രി അശോക് ഗെഹ്‍ലോട്ട്.

സര്‍ക്കാറുകള്‍ മാറി മാറി വരുന്ന രാജസ്ഥാനിലെ കീഴ്വക്കം മാറുമെന്നും അദ്ദേഹം പറഞ്ഞു. ആജ് തക് ചാനലിന് നല്‍കിയ അഭിമുഖത്തിലാണ് അദ്ദേഹത്തിന്റെ പരാമര്‍ശം. ഇത്തവണ എന്തായാലും കോണ്‍ഗ്രസ് സര്‍ക്കാര്‍ വീണ്ടും അധികാരത്തിലെത്തുമെന്ന് അശോക് ഗെഹ്ലോട്ട് കൂട്ടിച്ചേര്‍ത്തു.

കോണ്‍ഗ്രസ് സര്‍ക്കാറിന് അനുകൂലമാണ് രാജസ്ഥാനിലെ ജനങ്ങളുടെ മനസ്സ്. 70 വര്‍ഷം കേരളത്തില്‍ കോണ്‍ഗ്രസും സി.പി.എമ്മും ഒന്നിടവിട്ട് ഭരിച്ചു. പക്ഷേ ഇത്തവണ സി.പി.എം വീണ്ടും അധികാരത്തിലെത്തി. നല്ല ഭരണം സി.പി.എം കാഴ്ചവെച്ചതിനെ തുടര്‍ന്നാണ് അവര്‍ക്ക് അധികാര തുടര്‍ച്ചയുണ്ടായതെന്നും അദ്ദേഹം പറഞ്ഞു.

തന്റെ സര്‍ക്കാറിന്റെ നല്ല പദ്ധതികള്‍ തുടരണമെങ്കില്‍ കോണ്‍ഗ്രസ് തന്നെ അധികാരത്തില്‍ വരണം. ബി.ജെ.പി ഭരണത്തിലെത്തിയാല്‍ താൻ തുടങ്ങിയ മുഴുവൻ പദ്ധതികളും അവര്‍ നിര്‍ത്തുമെന്നും അശോക് ഗെഹ്ലോട്ട് പറഞ്ഞു. നിലവില്‍ സര്‍ക്കാര്‍ കൊണ്ടു വന്നിട്ടുള്ള പദ്ധതികളെ ശക്തിപ്പെടുത്തുകയാണ് കോണ്‍ഗ്രസിന്റെ ലക്ഷ്യം. വോട്ട് ചെയ്യുമ്ബോള്‍ ജനങ്ങള്‍ക്ക് തെറ്റ് സംഭവിക്കില്ലെന്ന് തന്നെയാണ് വിശ്വാസമെന്നും അശോക് ഗെഹ്ലോട്ട് പറഞ്ഞു.