ഡല്‍ഹിയില്‍ സ്‌കൂളുകള്‍ക്ക് ബോംബ് ഭീഷണി; പരീക്ഷകള്‍ നിര്‍ത്തിവെച്ചു

ഡല്‍ഹിയില്‍ നിരവധി സ്കൂളുകള്‍ക്കുനേരെ ബോംബ് ഭീഷണി. ചാണക്യപുരിയിലെ സംസ്കൃതി സ്കൂള്‍, മയൂർ വിഹാറിലെ മദർ മേരി സ്കൂള്‍, വസന്ത്കുഞ്ജിലേയും ദ്വാരകയിലേയും ഡല്‍ഹി പബ്ലിക്ക് സ്കൂള്‍, സാകേതിലെ അമിറ്റി സ്കൂള്‍ എന്നിവിടങ്ങളിലാണ് ബോംബ് ഭീഷണി.

ഇവ കൂടാതെ കൂടുതല്‍ സ്കൂളുകള്‍ക്ക് സന്ദേശം ലഭിച്ചതായി വിവരമുണ്ട്. ഇ- മെയിലില്‍ ഭീഷണിസന്ദേശം ലഭിച്ച സാഹചര്യത്തില്‍ പോലീസ് തിരച്ചില്‍ ആരംഭിച്ചു.

ഭീഷണിയെത്തുടർന്ന് മദർ മേരി സ്കൂളില്‍ നടന്നുവരുന്ന പരീക്ഷ നിർത്തിവെച്ചു. സ്കൂള്‍ പരിസരത്തുള്ളവരോട് ഒഴിഞ്ഞുപോകാൻ ആവശ്യപ്പെട്ടു. ഭീഷണിസന്ദേശം ലഭിച്ച സാഹചര്യത്തില്‍ മുൻകരുതല്‍ നടപടിയെന്ന നിലയില്‍ വിദ്യാർഥികളെ അടിയന്തരമായി തിരിച്ചയക്കുന്നതായി രക്ഷിതാക്കള്‍ക്കയച്ച ഇ- മെയിലില്‍ ഡല്‍ഹി പബ്ലിക്ക് സ്കൂള്‍ അറിയിച്ചു.

വിവരത്തിന്റെ അടിസ്ഥാനത്തില്‍ സ്കൂളുകളില്‍ എത്തിയ പോലീസ് സംഘം പരിസരത്തുനിന്ന് ആളുകളെ ഒഴിപ്പിച്ചു. വിദ്യാർഥികളെ വീട്ടിലേക്ക് കൊണ്ടുപോകാൻ രക്ഷിതാക്കള്‍ സ്കൂളുകളിലേക്ക് എത്തിക്കൊണ്ടിരിക്കുകയാണ്. ബോംബ് സ്ക്വാഡും ഡല്‍ഹി അഗ്നിരക്ഷാസേനയും തിരച്ചില്‍ തുടരുകയാണ്. സംശയകരമായ ഒന്നും ഇതുവരെ കണ്ടെത്തിയിട്ടില്ല.