തട്ടിക്കൊണ്ടുപോയ കേസില്‍ ജാമ്യത്തിലിറങ്ങി; അതേ പെണ്‍കുട്ടിയെത്തന്നെ ബലാത്സംഗം ചെയ്ത്‌ പ്രതി

ഉത്തർ പ്രദേശില്‍ പതിനേഴുകാരിയെ തട്ടിക്കൊണ്ടുപോയ കേസില്‍ ജാമ്യം ലഭിച്ച പ്രതി ദിവസങ്ങള്‍ക്ക് ശേഷം വീണ്ടും അതേ പെണ്‍കുട്ടിയെത്തന്നെ തട്ടിക്കൊണ്ടുപോയി ബലാത്സംഗം ചെയ്തു.

ബീഹാറിലെ ഭോജ്പൂർ ജില്ലക്കാരനായ വീരനാഥ് പാണ്ഡെയാണ് പെണ്‍കുട്ടിയെത്തട്ടിക്കൊണ്ട് പോയത്. ഇതേ പെണ്‍കുട്ടിയെ തട്ടിക്കൊണ്ടുപോയതിന് മുമ്ബ് ഇയാള്‍ ജയില്‍ ശിക്ഷ അനുഭവിച്ചിട്ടുണ്ട്. ജാമ്യത്തില്‍ പുറത്തിറങ്ങിയ ശേഷം, 2024 ആഗസ്ത് അഞ്ചിന് പാണ്ഡെ വീണ്ടും കുട്ടിയെ തട്ടിക്കൊണ്ടുപോയി,ഒരു മാസത്തോളം ലൈംഗികമായി ഉപദ്രവിച്ചതായി പൊലീസ് പറഞ്ഞു.

2024 മെയ് മാസത്തിലാണ് ഇയാള്‍ ആദ്യം പെണ്‍കുട്ടിയെത്തതട്ടിക്കൊണ്ടുപോയത്. മകളെ കാണാനില്ലെന്ന് ആരോപിച്ച്‌ പെണ്‍കുട്ടിയുടെ പിതാവ് കൊയ്റൗണ പോലീസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ പൊലീസ് കേസെടുക്കുകയായിരുന്നു.

ശൗചാലയത്തിലേക്ക് പോകുന്നതിനിടെയാണ് പെണ്‍കുട്ടിയെ പ്രതി രണ്ടാമതും തട്ടിക്കൊണ്ട് പോയതെന്ന് കൊയ്റൗണ പോലീസ് സ്റ്റേഷൻ ഇൻ-ചാർജ് ഇൻസ്പെക്ടർ മനോജ് കുമാർ പറഞ്ഞു.