ഐപിഎല്‍ 2022: ‘ടോപ്പ്’ ആവാന്‍ ഗുജറാത്ത്; ജയിക്കാനുറച്ച് കൊല്‍ക്കത്ത
Sports Desk
Posted On April 23, 2022
പോയിന്റ് പട്ടികയില്‍ ഒന്നാമതെത്താന്‍ ഗുജറാത്ത്. നാലാം തോല്‍വി ഒഴിവാക്കി വിജയവഴിയില്‍ തിരികെ എത്താന്‍ കൊല്‍ക്കത്ത. ഐപിഎല്‍ സൂപ്പര്‍ സാറ്റര്‍ഡേയിലെ ആദ്യ മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സ് ഗുജറാത്ത് ടൈറ്റന്‍സിനെ നേരിടും. നവി മുംബൈയിലെ ഡി.വൈ. പാട്ടീല്‍ സ്റ്റേഡിയത്തില്‍ വൈകുന്നേരം 3.30 മുതലാണ് മത്സരം.
പുതുതായി രൂപീകരിച്ച ടീമാണെങ്കില്‍ പോലും തുടക്കക്കാരുടെ പതര്‍ച്ചയില്ലാതെ മികച്ച പ്രകടനമാണ് ഗുജറാത്ത് പുറത്തെടുക്കുന്നത്. ഇന്നലെ നടന്ന മത്സരത്തില്‍ ഡല്‍ഹിക്കെതിരെ ആവേശ ജയം നേടി രാജസ്ഥാന്‍ പോയിന്റ് പട്ടികയില്‍ ഗുജറാത്തിനെ പിന്‍തള്ളി ഒന്നാമതെത്തിയിരുന്നു. നഷ്ട്ടപ്പെട്ട ഒന്നാം സ്ഥാനം തിരിച്ചെടുക്കുകയാവും ഗുജറാത്തിനു മുന്നിലുള്ള പ്രധാന ലക്ഷ്യം.
സ്ഥിരതയില്ലായ്മയാണ് കൊല്‍ക്കത്ത നേരിടുന്ന പ്രധാന വെല്ലുവിളി. ജയത്തോടെയാണ് സീസണ്‍ തുടങ്ങിയതെങ്കിലും മൂന്ന് തുടര്‍ തോല്‍വികളാണ് ഒടുവിലെ സമ്പാദ്യം. അവസാന ഓവറുകളില്‍ കൊല്‍ക്കത്ത ബൗളര്‍മാര്‍ റണ്ണുകള്‍ വിട്ടുനല്‍കുന്നതും തിരിച്ചടിയാകുന്നുണ്ട്. കഴിഞ്ഞ കളിയില്‍ ആരോണ്‍ ഫിഞ്ചും ശ്രയസ് അയ്യരും കാഴ്ച്ചവെച്ച ബാറ്റിങ്ങ് മികവിലാണ് നൈറ്റ് റൈഡേഴ്‌സിന്റെ പ്രതീക്ഷ.
ചെന്നൈ സൂപ്പര്‍ കിംഗ്‌സിനെതിരായ കഴിഞ്ഞ മത്സരം പരിക്ക് കാരണം നഷ്ട്ടമായ ഗുജറാത്ത് നായകന്‍ ഹാര്‍ദിക് പാണ്ഡ്യ തിരിച്ചെത്തിയേക്കും. കൊല്‍ക്കത്ത നിരയില്‍ പാറ്റ് കമ്മിന്‍സിന് പകരം ടിം സൗത്തിയും എത്തിയേക്കും.
ഇന്ന് നടക്കുന്ന രണ്ടാം മത്സരത്തില്‍ റോയല്‍ ചലഞ്ചേഴ്‌സ് ബാംഗ്ലൂര്‍ സണ്‍റൈസേഴ്‌സ് ഹൈദരാബാദിനെ നേരിടും. രാത്രി 7.30 മുതല്‍ മുംബൈ ബ്രബോണ്‍ സ്‌റ്റേഡിയത്തിലാണ് മത്സരം.
Content Highlight: IPL KKR vs GT
Trending Now
