പോലീസ് ചോദ്യം ചെയ്യാൻ കൊണ്ടുപോയ യുവാവ് ദുരൂഹസാഹചര്യത്തിൽ മരിച്ചനിലയിൽ: ആരോപണം നിഷേധിച്ച് പൊലീസ്
News Desk
Posted On April 27, 2022
കോഴിക്കോട് ജില്ലയില്‍ പോലീസ് ചോദ്യം ചെയ്യാൻ കൂട്ടിക്കൊണ്ടുപോയ യുവാവ് ദുരൂഹ സാഹചര്യത്തില്‍ മരിച്ചു. കോഴിക്കോട് ചെറുവണ്ണൂര്‍ ബിസി റോഡ് നാറാണത്തുവീട്ടില്‍ ജിഷ്ണുവാണ് (28) മരിച്ചത്. ചൊവ്വാഴ്ച്ച വൈകിട്ടോടെ പോലിസെന്ന് പറഞ്ഞെത്തിയ രണ്ടുപേര്‍ ജിഷ്ണുവിനെ വീട്ടില്‍ നിന്ന് കൂട്ടികൊണ്ട് പോയെന്ന് മരിച്ച യുവാവിന്റെ ബന്ധു പറഞ്ഞതായി ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നു. പിന്നീട് ജിഷ്ണുവിനെ വീടിനു സമീപം അത്യാസന്ന നിലയില്‍ കണ്ടെത്തുകയായിരുന്നു. നാട്ടുകാര്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
സംഭവത്തില്‍ പോലീസിന്റെ ഇടപെടല്‍ ഉണ്ടെന്ന സംശയമുള്ളതിനാൽ പോസ്റ്റുമോർട്ടം അടക്കമുള്ള കാര്യങ്ങള്‍ സുതാര്യമായി, ഉന്നത ഉദ്യോഗസ്ഥരുടെ സാന്നിധ്യത്തില്‍ നടത്തണമെന്ന് ജിഷ്ണുവിന്റെ ബന്ധു ഷാബു പറഞ്ഞു.
എന്നാല്‍ ജിഷ്ണുവിനെ കസ്റ്റഡിയില്‍ എടുത്തിട്ടില്ല എന്ന് നല്ലളം പോലീസ് സാര്‍ക്ക് ലൈവിനോടു പറഞ്ഞു. പോലീസ് കൈകാണിച്ചിട്ട് വാഹനം നിര്‍ത്താതെ പോയ സംഭവത്തില്‍ ജിഷ്ണുവിനെ അന്വേഷിച്ച് പോയിരുന്നെന്നും, എന്നാൽ വീട്ടിലെത്തിയപ്പോൾ ജിഷ്ണു അവിടെ ഉണ്ടായിരുന്നിലെന്നുമാണ് നല്ലളം പോലീസ് പറയുന്നത്.
Content Highlight: Kozhikode- Youth found dead under mysterious circumstances after allegedly arrested by cops
Trending Now
