പോലീസുകാരുടെ ദുരൂഹ മരണം കാട്ടുപന്നിക്കായുള്ള വൈദ്യുത കെണിയില്‍ കുടുങ്ങി? രണ്ടു പേര്‍ കസ്റ്റഡിയില്‍

പാലക്കാട് മുട്ടിക്കുളങ്ങരയില്‍ രണ്ടു പോലീസുകാര്‍ ദുരൂഹമായി മരിച്ച സംഭവത്തില്‍ രണ്ടു പേര്‍ കസ്റ്റഡിയില്‍. കാട്ടുപന്നിയെ പിടിക്കാനായി വെച്ച വൈദ്യുത കെണിയില്‍ കുടുങ്ങിയാണ് മരണം എന്ന് സംശയിക്കുന്നു. പിടിയിലായവര്‍ പ്രദേശത്ത് വൈദ്യുത കെണി വെക്കാറുണ്ടെന്ന് മൊഴി നല്‍കിയെന്നാണ് വിവരം. ഇവരെ ചോദ്യം ചെയ്തു വരികയാണ്.

മുട്ടിക്കുളങ്ങര പോലീസ് ക്യാമ്പിന് പിന്നിലെ വയലിലാണ് പോലീസുകാരെ മരിച്ച നിലയില്‍ കണ്ടെത്തിയത്. ഹവില്‍ദാര്‍മാരായ അശോകന്‍, മോഹന്‍ദാസ് എന്നിവാണ് മരിച്ചത്. പോലീസ് ക്യാമ്പിന് പിന്നിലെ വയലിലായിരുന്നു മൃതദേഹങ്ങള്‍.

ഇവര്‍ ഷോക്കേറ്റ് മരിച്ചുവെന്നായിരുന്നു പ്രാഥമിക നിഗമനം. ശരീരത്തില്‍ പൊള്ളലേറ്റ പാടുകളുണ്ടായിരുന്നു. ഇന്നലെ രാത്രി മുതല്‍ കാണാതായിരുന്ന ഇവര്‍ക്കു വേണ്ടി തെരച്ചില്‍ നടത്തിയിരുന്നെങ്കിലും രാവിലെയാണ് ഇവരെ മരിച്ച നിലയില്‍ കണ്ടെത്തിയത്.

Content Highlight: Two detained in palakkad cop death incident