കൊച്ചിയില്‍ നടുറോഡില്‍ യുവതിയെ മര്‍ദ്ദിച്ചത് പ്രതിശ്രുതവരനും സുഹൃത്തുക്കളും

കൊച്ചി നഗരമദ്ധ്യത്തില്‍ പുലർച്ചയോടെ യുവതിയെ മർദ്ദിച്ചത് പ്രതിശ്രുതവരനെന്ന് വിവരം. വൈകിയെത്തിയതുമായി ബന്ധപ്പെട്ട തർക്കമാണ് മർദ്ദനത്തിന് കാരണമെന്നാണ് പെണ്‍കുട്ടി പൊലീസിന് മൊഴി നല്‍കിയിരിക്കുന്നത്. സംഭവത്തില്‍ പ്രതിശ്രുത വരനും സുഹൃത്തുക്കള്‍ക്കുമെതിരെ പൊലീസ് കേസെടുത്തു.

ബുധനാഴ്ച പുലർച്ചെ 4.30നാണ് സംഭവം നടന്നത്. വെെറ്റിലയില്‍ നിന്ന് കടവന്ത്രയിലേക്കുള്ള സഹോദരൻ അയ്യപ്പൻ റോഡിന്റെ വശത്തുള്ള ജനതാ റോഡില്‍ വച്ച്‌ നാലുപേർ ചേർന്ന് യുവതിയെ ക്രൂരമായി മർദ്ദിക്കുകയായിരുന്നു. യുവതി നിലവിളിച്ചിട്ടും മർദ്ദനം തുടരുകയും നിലത്തിട്ട് ചവിട്ടുകയും ചെയ്തു. സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നിരുന്നു. മർദ്ദനത്തെത്തുടർന്ന് ആശുപത്രിയില്‍ ചികിത്സ തേടിയതിന് പിന്നാലെയാണ് യുവതി പരാതി നല്‍കിയതെന്ന് പൊലീസ് വ്യക്തമാക്കി. മർദ്ദിച്ചതിനാണ് കേസ് എടുത്തത്.

മർദ്ദിച്ച യുവാവ് യുവതിയുടെ ബന്ധുവാണ്. ഇരുവരും അടുത്തുതന്നെ വിവാഹിതരാകാൻ തീരുമാനിച്ചിരുന്നു. ബ്യൂട്ടി പാർലർ നടത്തുന്ന യുവതി പുലർച്ചെ നാല് മണിയോടെയാണ് യുവാക്കള്‍ താമസിക്കുന്ന സ്ഥലത്തെത്തിയത്. ഫോണിലൂടെ സംസാരിച്ചുവരികയായിരുന്ന പെണ്‍കുട്ടിയെ കാത്തുനിന്ന് യുവാവ് മർദ്ദിക്കുകയായിരുന്നു. ഇതുകണ്ട് പരിസരത്തുണ്ടായിരുന്ന ചിലർ ഇടപെട്ടെങ്കിലും പ്രശ്‌നമില്ലെന്ന് പറഞ്ഞ് ഇരുവരും ജനതാ റോഡ് ഭാഗത്തേയ്ക്ക് നടന്നുപോയി. തുടർന്നുണ്ടായ മർദ്ദനത്തിന്റെ ദൃശ്യങ്ങളാണ് പുറത്തുവന്നത്.

മർദ്ദനവും യുവതിയുടെ അലറിക്കരച്ചിലും കേട്ട സമീപവാസികള്‍ അറിയിച്ചതിനെത്തുടർന്ന് പൊലീസ് സ്ഥലത്തെത്തിയിരുന്നു. മർദ്ദനം നടന്ന സ്ഥലത്ത് യുവതിയെയും യുവാക്കളെയും പൊലീസ് കാണുകയും ചെയ്തു. എന്നാല്‍ മർദ്ദിച്ചതില്‍ പരാതിയില്ലെന്നായിരുന്നു യുവതി പൊലീസിനോട് പറഞ്ഞത്. പിന്നീട് ആശുപത്രിയിലെത്തി ചികിത്സ തേടിയതിനുശേഷമാണ് പരാതി നല്‍കിയത്.