ബോളിവുഡ് നടൻ മിതിലേഷ് ചതുര്‍വേദി അന്തരിച്ചു

ബോളിവുഡ് നടൻ മിതിലേഷ് ചതുര്‍വേദി (67) അന്തരിച്ചു. ഇന്ന് രാവിലെ ഹൃദയാഘാതത്തെ തുടർന്നായിരുന്നു അന്ത്യമെന്ന് കുടുംബം അറിയിച്ചു. മുംബൈ വെർസോവയിലെ ശ്‌മശാനത്തിൽ വച്ച് വൈകുന്നേരമായിരിക്കും സംസ്കാരം നടക്കുക. മിതിലേഷിനെ പത്ത് ദിവസം മുന്‍പ് ഹൃദയാഘാതത്തെ തുടര്‍ന്ന് മുംബൈയിലെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. ശ്വസന സംബന്ധമായ അസുഖങ്ങളുമായി ചികിത്സയിൽ കഴിയുകയായിരുന്നു. പുലർച്ചെ നാല് മണിയോടെ ഉണ്ടായ ഹൃദയാഘാതത്തെ തുടർന്നായിരുന്നു മരണം.

‘ഭായ് ഭായ്’ ആണ് മിതിലേഷ് ചതുര്‍വേദിയുടെ ആദ്യ ചിത്രം. പിന്നീട് മുപ്പതിലധികം ചിത്രങ്ങളിൽ അഭിനയിച്ചു. ‘കോയി മില്‍ഗയാ’, ‘സത്യ’, ‘റെഡി’ തുടങ്ങിയ ചിത്രങ്ങളിൽ ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്. ‘താല്‍’, ‘അശോക’, ‘ഫിസ’, ‘ഗുലാബോ സിതാബോ’, വെബ് സീരീസായ ‘സ്‌കാം 1992’ തുടങ്ങിയ ചിത്രങ്ങളിലെ കഥാപാത്രങ്ങൾ ശ്രദ്ധിക്കപ്പെട്ടു.

Content Highlights – Bollywood actor mithilesh chaturvedi passes away