കോട്ടയത്ത് സ്വകാര്യ ബസില്‍ നിന്ന് തെറിച്ചുവീണ് എട്ടാം ക്ലാസുകാരന് പരിക്ക്

കോട്ടയത്ത് സ്വകാര്യ ബസില്‍ നിന്ന് തെറിച്ചു വീണ് എട്ടാം ക്ലാസ് വിദ്യാര്‍ത്ഥിക്ക് പരിക്കേറ്റു. അഭിരാം എന്ന വിദ്യാര്‍ത്ഥിയാണ് ബസില്‍ നിന്ന് തെറിച്ചുവീണത്. പാക്കില്‍ പവര്‍ ഹൗസ് ജംഗ്ഷനില്‍ വെള്ളിയാഴ്ച വൈകുന്നേരം നാലു മണിയോടെയാണ് അപകടം നടന്നത്. കുട്ടിയുടെ രണ്ട് പല്ലുകള്‍ ഇളകി, ചുണ്ടിനും വലത് കൈ മുട്ടിനും പരിക്കേറ്റു.

കുട്ടിയെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. കോട്ടയം- കൈനടി റൂട്ടിലോടുന്ന ചിപ്പി ബസ്സാണ് അപകടമുണ്ടാക്കിയത്. ബസ് അമിത വേഗത്തിലായിരുന്നുവെന്ന് നാട്ടുകാര്‍ പറഞ്ഞു. ബസ്സിന്റെ വാതില്‍ തുറന്ന് കിടക്കുകയായിരുന്നുവെന്ന് കുട്ടിയുടെ പിതാവ് ഷിനോ പറഞ്ഞു.

സംഭവത്തില്‍ ആര്‍.ടി.ഒ. പ്രാഥമിക അന്വേഷണം ആരംഭിച്ചു. ബസിനെതിരെ നടപടിയുണ്ടാകുമെന്നും ഡ്രൈവറോട് അടുത്ത ദിവസം ഹാജരാകാന്‍ നിര്‍ദ്ദേശിച്ചതായും ആര്‍.ടി.ഒ. അറിയിച്ചു.