എംഡിഎംഎയുമായി യുവാവ് പിടിയില്‍; ലഹരിമരുന്ന് കാറില്‍ ഒളിപ്പിച്ച നിലയില്‍

മാരക മയക്കുമരുന്നായ എം.ഡി.എം.എ യുമായി യുവാവ് പോലീസ് പിടിയില്‍. ആലുവ കീഴ്മാട് മുടക്കാലില്‍ ടിബിന്‍ (30) ആണ് എടത്തല പോലീസിന്റെ പിടിയിലായത്. ഇയാളില്‍ നിന്ന് 15.150 ഗ്രാം എം.ഡി.എം.എ കണ്ടെടുത്തു. ജില്ലാ പോലീസ് മേധാവി വിവേക് കുമാറിന് ലഭിച്ച രഹസ്യവിവരത്തെ തുടര്‍ന്ന് നടത്തിയ റെയ്ഡിലാണ് മയക്കുമരുന്ന് പിടികൂടിയത്.

കാറില്‍ പ്രത്യേക അറയില്‍ മൂന്നു കവറുകളിലാക്കി ഒളിപ്പിച്ച നിലയിലായിരുന്നു. ക്രിസ്തുമസ് – പുതുവത്സര ആഘോഷങ്ങള്‍ക്കായി വില്‍പ്പന നടത്തുകയായിരുന്നു ലക്ഷ്യം. മയക്കുമരുന്ന് കച്ചവടം നടത്തുന്ന ടിബിനെ പോലീസ് നിരീക്ഷിച്ചു വരികയായിരുന്നു. യുവാക്കള്‍ക്കും വിദ്യാര്‍ത്ഥികള്‍ക്കും പ്രത്യേകം ചെറിയ പായ്ക്കറ്റുകളിലാക്കിയാണ് ഇയാള്‍ രാസലഹരി വില്‍പ്പന നടത്തിയിരുന്നത്.

നര്‍ക്കോട്ടിക് സെല്‍ ഡി.വൈ.എസ്.പി പി.പി.ഷംസ്, ഇന്‍സ്‌പെക്ടര്‍ പി.ജെ.നോബിള്‍, എസ്.ഐ കെ.കെ.ഷെബാബ്, എ.എസ്.ഐമാരായ അബ്ദുള്‍ ജമാല്‍, അബ്ദുള്‍ റഹ്‌മാന്‍, സീനിയര്‍ സിവില്‍ പോലീസ് ഓഫീസര്‍മാരായ ഐ.വി.ബിനീഷ്, സി.പി.ഒ അനീഷ് തുടങ്ങിയവര്‍ ചേര്‍ന്നാണ് പിടികൂടിയത്.