യുവനടിമാര്‍ക്കെതിരായ ലൈംഗികാതിക്രമം; പോലീസ് കേസെടുത്തു

കോഴിക്കോട് ഹൈലൈറ്റ് മാളില്‍ യുവനടിമാര്‍ക്കെതിരെയുണ്ടായ ലൈംഗികാതിക്രമത്തില്‍ കേസെടുത്ത് പോലീസ്. ആക്രമണത്തിന് ഇരയായ നടിയും ചിത്രത്തിന്റെ നിര്‍മാതാവും നല്‍കിയ പരാതിയിലാണ് നടപടി. മാളിലെ സിസിടിവി ദൃശ്യങ്ങള്‍ ശേഖരിക്കുമെന്നും നടിമാരുടെ മൊഴിയെടുക്കുമെന്നും പോലീസ് അറിയിച്ചു. മാളിലെത്തിയപ്പോള്‍ തനിക്കും കൂടെയുണ്ടായിരുന്ന സഹപ്രവര്‍ത്തകക്കും അതിക്രമം നേരിടേണ്ടി വന്നെന്ന് നടി തന്നെയാണ് കഴിഞ്ഞദിവസം ഇന്‍സ്റ്റഗ്രാമില്‍ വെളിപ്പെടുത്തിയത്.

ഒരാള്‍ സ്ഥലത്തു വെച്ചു തന്നെ പ്രതികരിക്കുന്നതിന്റെ ദൃശ്യങ്ങളും പുറത്തു വന്നിട്ടുണ്ട്. ചൊവ്വാഴ്ച വൈകുന്നേരമായിരുന്നു സംഭവം. മാളില്‍ നടന്ന പ്രമോഷന്‍ പരിപാടിക്കു ശേഷം തിരിച്ചിറങ്ങുമ്പോളായിരുന്നു സംഭവം. നടിമാര്‍ ആള്‍ക്കൂട്ടത്തിനിടയിലൂടെയാണ് ഇറങ്ങിയത്. ഇതിനിടയില്‍ തന്നെ ഒരാള്‍ കയറിപ്പിടിച്ചുവെന്ന് നടി കുറിപ്പില്‍ പറയുന്നു.

ഇതോടെ താന്‍ മരവിച്ചു പോയി. പ്രതികരിക്കാന്‍ സാധിച്ചില്ല. തനിക്കൊപ്പമുണ്ടായിരുന്ന മറ്റൊരു നടിക്കും സമാന അനുഭവമുണ്ടായി. അവര്‍ അതിനു പ്രതികരിച്ചു.