വയനാട്ടിലെ എംപി ഓഫീസ് ആക്രമണം; രാഹുല്‍ ഗാന്ധി സീതാറാം യെച്ചൂരിയുമായി സംസാരിച്ചു

വയനാട്ടിലെ എംപി ഓഫീസ് ആക്രമിച്ച സംഭവത്തില്‍ രാഹുല്‍ ഗാന്ധി സിപിഎം ജനറല്‍ സെക്രട്ടറി സീതാറാം യെച്ചൂരിയുമായി സംസാരിച്ചു. സംഭവത്തെ സിപിഎം അപലപിച്ചിട്ടുണ്ടെന്ന് യെച്ചൂരി രാഹുല്‍ ഗാന്ധിയോട് പറഞ്ഞു. സര്‍ക്കാര്‍ ഇക്കാര്യത്തില്‍ നടപടിയെടുക്കുന്നുണ്ടെന്നും യെച്ചൂരി രാഹുലിനെ അറിയിച്ചു. അതേസമയം മുഖ്യമന്ത്രിക്കെതിരെ കോണ്‍ഗ്രസ് പ്രവര്‍ത്തകര്‍ തുടരുന്ന പ്രതിഷേധത്തില്‍ യെച്ചൂരി അതൃപ്തി അറിയിച്ചു. വിമാനത്തില്‍ മുഖ്യമന്ത്രിക്കെതിരായ കോണ്‍ഗ്രസ് പ്രവര്‍ത്തകരുടെ പ്രതിഷേധത്തെക്കുറിച്ചും യെച്ചൂരി ചൂണ്ടിക്കാട്ടി.

വെള്ളിയാഴ്ചയാണ് എസ്എഫ്‌ഐ പ്രവര്‍ത്തകര്‍ കല്‍പറ്റയിലെ എംപി ഓഫീസ് തകര്‍ത്തത്. ഓഫീസില്‍ അതിക്രമിച്ചു കയറി പ്രതിഷേധിച്ച എസ്എഫ്‌ഐ പ്രവര്‍ത്തകര്‍ രാഹുല്‍ ഗാന്ധിയുടെ കസേരയില്‍ വാഴ സ്ഥാപിക്കുകയും ചെയ്തിരുന്നു. സംഭവത്തെ ആദ്യഘട്ടത്തില്‍ തന്നെ മുഖ്യമന്ത്രിയും സിപിഎമ്മും തള്ളിപ്പറഞ്ഞിരുന്നു. എസ്എഫ്‌ഐ നേതൃത്വവും ഇതിനെ തള്ളിപ്പറഞ്ഞ് രംഗത്തെത്തി. സംഭവത്തില്‍ സംസ്ഥാനമൊട്ടാകെ യുഡിഎഫ് പ്രതിഷേധം സംഘടിപ്പിച്ചിരുന്നു.

Content Highlights: Rahul Gandhi, Sitaram Yechury, Office Attack, Wayanadu