ഓഫീസ് ആക്രമണം നിരുത്തരവാദപരം; പക്ഷേ, കുട്ടികളോട് ദേഷ്യമില്ലെന്ന് രാഹുല്‍ ഗാന്ധി

തന്റെ ഓഫീസ് തല്ലിത്തകര്‍ത്ത സംഭവം ദൗര്‍ഭാഗ്യകരമാണെങ്കിലും കുട്ടികളോട് ദേഷ്യമില്ലെന്ന് രാഹുല്‍ ഗാന്ധി. കല്‍പറ്റയില്‍ തകര്‍ക്കപ്പെട്ട ഓഫീസ് സന്ദര്‍ശിച്ചതിന് ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു രാഹുല്‍. സമാധാനത്തിന്റെ മാര്‍ഗ്ഗത്തിലൂടെ ജനങ്ങളെ ഒരുമിപ്പിച്ചു നിര്‍ത്താനാണ് കോണ്‍ഗ്രസ് ശ്രമിക്കുന്നതെന്നും അദ്ദേഹം പറഞ്ഞു.

തന്റെ ഓഫീസ് എന്നതിലുപരി വയനാട്ടുകാരുടെ ശബ്ദം ഉയര്‍ന്നു കേള്‍ക്കുന്നതിനുള്ള ഓഫീസാണ് ഇത്. കുട്ടികളാണ് ആക്രമണത്തിന് പിന്നിലെന്നാണ് മനസിലാക്കുന്നത്. ആക്രമണം നിരുത്തരവാദിത്തപരമായ നടപടിയാണ്. എന്നാല്‍ അതില്‍ തനിക്ക് അവരോട് ദേഷ്യമില്ല.

അനന്തരഫലത്തെക്കുറിച്ച് ചിന്തിക്കാതെയായിരിക്കാം അവര്‍ ആക്രമണം നടത്തിയതെന്നും രാഹുല്‍ കൂട്ടിച്ചേര്‍ത്തു. ഓഫീസ് ആക്രമിക്കപ്പെട്ടതിന് ശേഷം ആദ്യമായാണ് രാഹുല്‍ തന്റെ ഓഫീസില്‍ എത്തിയത്. എകെജി സെന്റര്‍ ആക്രമണത്തിന്റെ പശ്ചാത്തലത്തില്‍ കനത്ത സുരക്ഷയിലാണ് രാഹുലിന്റെ സന്ദര്‍ശനം.

Content Highlights: Rahul Gandhi, Kalpetta, Congress, AKG Centre