ക്രിക്കറ്റ് താരം ഋഷഭ് പന്തിന് കാറപകടത്തില്‍ പരിക്ക്; ഡിവൈഡറില്‍ ഇടിച്ച കാര്‍ പൂര്‍ണ്ണമായും കത്തിനശിച്ചു

ക്രിക്കറ്റ് താരം ഋഷഭ് പന്തിന് കാറപകടത്തില്‍ പരിക്ക്. പന്ത് ഓടിച്ച കാര്‍ ഡിവൈഡറില്‍ ഇടിച്ചാണ് അപകടം. കാര്‍ പൂര്‍ണ്ണമായും കത്തി നശിച്ചു. കാറിന്റെ ഗ്ലാസ് തകര്‍ത്താണ് പന്തിനെ പുറത്തെടുത്തത്. താരത്തെ ഡെഹ്‌റാഡൂണിലെ മാക്‌സ് ആശുപത്രിയില്‍ പ്രവേശിപ്പിച്ചു.

ഡല്‍ഹിയില്‍ നിന്ന് സ്വന്തം നാടായ റൂര്‍ക്കിയിലേക്ക് സ്വയം ഡ്രൈവ് ചെയ്ത് പോകുകയായിരുന്നു പന്ത്. അപകട സമയത്ത് മറ്റാരും വാഹനത്തില്‍ ഉണ്ടായിരുന്നില്ല. തലയ്ക്കും കാലിനുമാണ് പരിക്കേറ്റത്. കാലില്‍ പൊട്ടലുണ്ടെന്നാണ് വിവരം. ഡ്രൈവിംഗിനിടെ ഉറങ്ങിപ്പോയതാണ് അപകടത്തിന് കാരണമായത്.

പന്തിന്റെ പരിക്കുകള്‍ ഗുരുതരമല്ലെന്നാണ് മാക്‌സ് ആശുപത്രി വൃത്തങ്ങള്‍ നല്‍കുന്ന സൂചന. സ്‌കാനിംഗ് ഉള്‍പ്പെടെയുള്ള പരിശോധനകള്‍ നടത്തി വരികയാണെന്നും ആശുപത്രി അറിയിച്ചു.