വിജയ് ബാബുവിന് സഹായം ചെയ്‌തെന്ന കണ്ടെത്തല്‍; സൈജു കുറുപ്പിനെ ചോദ്യം ചെയ്തു

വിജയ് ബാബു പ്രതിയായ ബലാല്‍സംഗക്കേസില്‍ നടന്‍ സൈജു കുറുപ്പിനെ ചോദ്യം ചെയ്തു. വിജയ് ബാബുവിന് വിദേശത്ത് ഒളിവില്‍ കഴിയാന്‍ സഹായം ചെയ്‌തെന്ന് കണ്ടെത്തിയതിനെ തുടര്‍ന്നാണ് നടപടി. ശനിയാഴ്ചയാണ് നടനെ ചോദ്യം ചെയ്തത്. എന്നാല്‍ വിജയ് ബാബുവിനെതിരായ കേസ് വരുന്നതിന് മുന്‍പാണ് താന്‍ സഹായിച്ചതെന്നാണ് സൈജു കുറുപ്പിന്റെ മൊഴി.

വിജയ് ബാബു ദുബായിലേക്ക് പോയപ്പോള്‍ ക്രെഡിറ്റ് കാര്‍ഡ് കൊടുക്കണമെന്ന് കുടുംബം അറിയിച്ചു. കാര്‍ഡ് നല്‍കിയതിന് ശേഷമാണ് മാധ്യമങ്ങളില്‍ നിന്ന് കേസ് സംബന്ധിച്ച വിവരം അറിഞ്ഞത്. യാത്രാരേഖകള്‍ പോലീസിന് നല്‍കിയിട്ടുണ്ടെന്നും സൈജു കുറുപ്പ് വ്യക്തമാക്കി.

കേസില്‍ വിജയ് ബാബു നല്‍കിയ മുന്‍കൂര്‍ ജാമ്യാപേക്ഷ ചൊവ്വാഴ്ച ഹൈക്കോടതി പരിഗണിക്കും. ഇടക്കാല ജാമ്യം തുടരുന്നതിനാല്‍ വിജയ് ബാബുവിനെ അറസ്റ്റ് ചെയ്യാനാകില്ല. ദുബായില്‍ നിന്ന് തിരിച്ചെത്തിയതിന് പിന്നാലെ പോലീസ് വിജയ് ബാബുവിനെ ചോദ്യം ചെയ്തിരുന്നു. ഇതിന്റെ വിവരങ്ങള്‍ പോലീസ് കോടതിയെ അറിയിക്കും.

Content Highlights: Vijay Babu, Rape Case, Saiju Kurup, Police, Interrogation