കോട്ടയത്ത് ഇതരസംസ്ഥാന തൊഴിലാളി സുഹൃത്തിനെ വെട്ടിക്കൊന്നു

കോട്ടയത്ത് ഒഡിഷ സ്വദേശിയായ തൊഴിലാളി സുഹൃത്തിനെ വെട്ടിക്കൊന്നു. നാഗമ്പടം ഗുഡ്‌സ്‌ഷെഡ് റോഡില്‍ ഉച്ചയ്ക്ക് രണ്ടരയോടെയാണ് സംഭവമുണ്ടായത്. നിര്‍മാണത്തൊഴിലാളിയായ ഷഷീര്‍ ആണ് കൊല്ലപ്പെട്ടത്. കൊലയ്ക്ക് ശേഷം സുഹൃത്ത് രാഗേന്ദ്ര ഗൗഡ റെയില്‍വേ പോലീസ് സ്‌റ്റേഷനിലെത്തി കീഴടങ്ങി. ഭാര്യയെക്കുറിച്ച് അശ്ലീലം പറഞ്ഞതാണ് കൊലയ്ക്ക് കാരണമെന്ന് ഇയാള്‍ മൊഴി നല്‍കിയിട്ടുണ്ട്.

ഷഷീറിനെ പ്രതി കോട്ടയത്തേക്ക് വിളിച്ചു വരുത്തിയാണ് കൃത്യം നടത്തിയത്. ഗുഡ്‌സ് ഷെഡ് റോഡിന് അടുത്തു വെച്ച് ഷഷീറിനെ വെട്ടി വീഴ്ത്തിയ ശേഷം ഇയാള്‍ തൊട്ടടുത്തുള്ള റെയില്‍വേ പോലീസ് സ്‌റ്റേഷനിലെത്തുകയായിരുന്നു. താന്‍ ഒരാളെ കൊന്നുവെന്ന് പറഞ്ഞാണ് ഇയാള്‍ കീഴടങ്ങാനെത്തിയത്.

റെയില്‍വേ പോലീസ് വിവരമറിയിച്ചതിനെ തുടര്‍ന്ന് കോട്ടയം ഈസ്റ്റ് പോലീസ് എത്തി രാഗേന്ദ്രയെ കസ്റ്റഡിയില്‍ എടുത്തു. കൊല നടന്ന സ്ഥലത്ത് ഫോറന്‍സിക് വിഭാഗം പരിശോധന നടത്തി.

Content Highlights: Murder, Migrant Laborer, Odisha